DILI, STLTIMORLESTE.com — Prezidente Repúblika (PR), José Ramos-Horta husu ba Banku Kaebauk no banku komersiál sira seluk atu aplika taxa funan asesível ba emprezáriu ki’ik sira, hodi apoia dezenvolvimentu ekonomia nasionál.
Iha serimónia inaugurasaun ofisiál Banku Kaebauk, S.A., iha Bebonuk, sexta-feira (23/10/2026), Prezidente Ramos-Horta enfatiza katak taxa funan ne’ebé aas bele hamenus oportunidade ba empreza ki’ik sira atu dezenvolve sira-nia negósiu.
“Ha’u nunka komprende tanbasá banku sira sempre kobra funan todan tebes iha merkadu. Ha’u la fiar negósiu ida iha rai hanesan Timor-Leste bele moris ho juros 10 porsentu; ha’u la fiar, imposível,” dehan Ramos-Horta.
Nia esplika katak, empreza ki’ik no boot presiza apoiu malu atu haburas ekonomia nasionál. Tanba ne’e, nia apela ba banku sira atu asegura asesu ba kréditu ho kondisaun ne’ebé justu no la todan ba kliente.
Prezidente mós destaka importánsia likidez finanseira atu apoia setór produtivu, inklui agrikultura, peskas no mikroempreza, ne’ebé kontribui ba kriasaun rendimentu no oportunidade ekonomia iha komunidade.
Entre-tantu, Xefe Ezekutivu Banku Kaebauk, S.A., Angelo Soares, hateten katak instituisaun ne’e sei foka ba mikrofinansas, ho objetivu atu apoia negósiu ki’ik sira, liuliu iha área rurál ne’ebé asesu ba servisu bankáriu sei limitadu.
Lansamentu Banku Kaebauk hanesan banku komersiál foun iha Timor-Leste marka etapa ida ba dezenvolvimentu setór bankáriu no servisu finanseiru iha país.
(eme)
