DÍLI, STLTIMORLESTE.com – Kongregasaun Misionáriu Claretianu (CMF) hamutuk ho sarani Parókia São José Aimutin selebra festa Santo António Maria Claret atu hametin fiar no misaun evangelizadora.
Liafuan hirak-ne’e hato’o husi Padre Justino Galvão, CMF, ba STL, iha selebrasaun festa Santo António Maria Claret iha Igreja São José Aimutin, Díli, Sábadu (24/10/2026).
Pe. Justino esplika
katak, Santo António Maria Claret moris iha Catalunha, Espanha, iha loron 23 Dezembru 1807.
Nia sai misionáriu no harii Kongregasaun Misionáriu Claretianu iha loron 16 Jullu 1849, hamutuk ho padre na’in lima seluk, Kongregasaun ne’e iha naran orijinál Filhos do Imaculado Coração de Maria no agora koñesidu hanesan Missionáriu Claretianu.
Objetivu prinsipál mak haklaken Evanjellu, promove edukasaun no formasaun espirituál, no fó atensaun ba ema kiak no ema ne’ebé presiza ajuda.
Iha tinan 1850, Santo António Maria Claret sai Arsebispu Santiago de Cuba.
Depois, nia fila ba Espanha no sai konfesor ba Rainha Isabel II. Nia mós partisipa iha Konsíliu Vatikanu I. Nia mate iha loron 24 Outubru 1870, iha Fransa.
Padre Justino dehan katak, misaun prinsipál Santo António Maria Claret mak hakarak ema hotu simu salvasaun husi Maromak no hetan dignidade hanesan oan Maromak nian.
Nia mós defende ema kiak, ema fraku, labarik órfaun no ema ne’ebé sofre injustisa, hodi promove respeitu ba dignidade umana no direitu umanu.
“Santo António Maria Claret ho nia lema Caritas Christi urget nos, katak domin Kristu nian mak dudu ami atu haklaken Maromak nia Evanjellu ba ema hotu-hotu,” hatete Padre Justino.
Nia afirma katak, maski Santo António Maria Claret nia mak ema matenek tebes, liu liu iha área edukasaun, maski nune’e, nia husik buat materiál sira atu dedika nia moris tomak ba haklaken Maromak nia Reinu.
Padre Justino mós esplika katak tema selebrasaun festa nian konvida fiéis sira hateke ba malu ho matan Kristu nian, tanba Kristu marka prezensa iha ema seluk.
Nune’e, nia konvida sarani Parókia São José Aimutin, liu liu joven katólika sira, atu envolve an ativamente iha misaun haklaken Maromak nia Liafuan ba ema hotu-hotu.
Nia hateten katak, anúnsiu Evanjellu la’ós de’it liu husi liafuan, maibé mós liu husi hakerek, edukasaun, servisu no ezemplu moris loroloron ne’ebé hatudu domin Kristu nian.
Selebrasaun Eukarístika ne’e prezide husi pároku São José Aimutin, Padre Benediktus Nuwa, CMF, akompaña husi Vigáriu Padre Belarmino D. C. Oliveira, CMF, no padre selebrante sira seluk.
Iha selebrasaun festa Santo António Maria Claret ne’e, partisipa mós madre, frater no sarani sira, hodi hamutuk selebra no hafoun sira-nia kompromisu ba fiar no servisu iha Igreja no sosiedade.
(joa)
