DÍLI, STLTIMORLESTE.com — Ekipa seleksaun nasional Timor-Leste Sub-15 sofre derrota ho rezultadu 0–6 kontra Azerbaijão, iha jogu abertura FIFA U-15 World Cup and Festival 2026, ne’ebé hala’o iha Baku Crystal Hall, Azerbaijão, sábadu, 24 Outubru 2026.
Azerbaijão, hanesan nasaun anfitriã, hatudu dominíu iha jogu ne’e no konsege marca golu neen sem hetan resposta husi Timor-Leste. Rezultadu ne’e fó vitória importante ba ekipa anfitriã iha kompetisaun ne’ebé halibur atleta jovem husi nasaun sira ne’ebé afiliadu ba FIFA.
Jogador neebé mak marka golu ba iha baliza Timor Leste mak hanesan, Mushfig Zamanov no Hasan Mahmadov kada ida marka golu rua, enkuantu Yusif Alizade no Asif Allahverdizade kada ida hatama golu ida. Nune’e, Azerbaijão kompleta vitória ho rezultadu 6–0.
Maski Timor-Leste la konsege hetan golu iha jogu abertura, partisipasaun iha kompetisaun internasionál ne’e sai oportunidade ba atleta jovem sira atu hetan esperiénsia no aprende husi kompetisaun ho ekipa husi nasaun seluk.
Kompetisaun FIFA U-15 World Cup and Festival 2026 sei kontinua to’o 30 Outubru 2026, iha Azerbaijão.
(leo)
