LAUTÉM, STLTIMORLESTE.com – Gabinete Fronteiras Terrestres no Marítimas (GFTM), hamutuk ho Ministériu Edukasaun (ME) no Autoridade Munisípiu Lautém, lansa eskultura “Lenuk” iha Ginásiu Suku Fuiloro, Postu Administrativu Lospalos, Munisípiu Lautém.
Sekretáriu Estadu Ensinu Sekundáriu Jerál no Tekniku Vokasionál, Domingos Lopes Lemos, hateten katak eskultura ne’e nu’udar parte husi kampaña sensibilizasaun kona-ba ekonomia azul, ne’ebé GFTM lidera ho kolaborasaun instituisaun relevante sira. Inisiativa ne’e kontinua esforsu promosaun arte públika, hanesan “Ikan Azul” ne’ebé lansa iha Dili husi Primeiru-Ministru Kay Rala Xanana Gusmão iha tinan 2024.
“Se Ikan Azul hela iha Dili, ohin Lenuk hi’it an iha Lautém. Ne’e hatudu ho klaru katak ekonomia azul la’ós pertense ba Dili de’it, maibé ba Timor-Leste tomak, hahú kedas husi Lautém,” Domingos Lopes Lemos hateten iha serimónia lansamentu, Sábadu (24/10/2026).
Nia esplika katak eskultura Lenuk ne’e la’ós de’it iha valór artístiku, maibé mos sai hanesan arte públika ne’ebé promove resiklajen no jestaun lixu plástiku, liuliu liuhusi halibur botir plástiku mamuk hodi transforma sai obra artístika.
Tuir Domingos, eskultura ne’e bele sai pontu atrasaun foun no fonte inspirasaun ba estudante, foin-sa’e no komunidade sira atu aumenta konsiénsia kona-ba perigu poluisaun plástiku no nesesidade atu proteje ekosistema tasi nian.
“Inisiativa ne’e kontribui diretamente ba prezervasaun tasi ne’ebé moos no biodiversidade tasi nian ne’ebé riku. Kada botir plástiku ne’ebé ita halibur, kontribui ba prezervasaun ita-nia tasi. Ida-ne’e mak ligasaun direta ba ita,” nia akresenta.
Domingos konsidera kriasaun eskultura Lenuk nu’udar inisiativa kreativa ne’ebé GFTM lidera iha koordenasaun ho Ministériu Edukasaun no Autoridade Munisípiu Lautém.
Tanba ne’e, Ministériu Edukasaun hato’o apresiasaun ba GFTM tanba nia kompromisu atu lori arte públika ba Lautém, hodi promove konsiénsia ambientál no dezenvolvimentu ekonomia azul.
Nia mós enkoraja estudante sira atu sai protetór ambientál, la soe lixu arbiru no dezenvolve kapasidade atu transforma materiál plástiku ne’ebé halibur sai produtu foun ho valór ekonomiku.
“Estudante sira, imi mak protetór ki’ik sira. Keta soe plástiku arbiru. Ba estudante ESG no ESTV, imi mak empreendedór azul aban-bainrua. Oinsá imi bele kria produtu foun ho valór husi plástiku ne’ebé halibur iha Lenuk Tasi nia kabun laran,” nia enkoraja.
Iha fatin hanesan, Prezidente Autoridade Munisípiu Lautém, Melio de Jesus, hateten katak sensibilizasaun kona-ba ekonomia azul la’ós foin hahú ohin, tanba kada selebrasaun Loron Oceanu nian, autoridade sira sempre organiza atividade no mobiliza estudante sira atu partisipa.
Nia subliña katak atividade sira ne’e importante ba komunidade sira atu komprende impaktu negativu husi lixu ba biodiversidade tasi nian, no muda sira-nia hahalok atu sai embaixadór ba protesaun ambiente tasi.
“Oinsá ita bele fó importánsia ba lixu sira ne’ebé fó impaktu ba ita-nia biodiversidade iha tasi? Ita tenke tau ida-ne’e iha ita-nia hanoin, hodi muda ita-nia hahalok no sai embaixadór ba ekonomia azul,” Melio de Jesus hateten.
Nia husu mós ba estudante sira atu dedika tempu minutu lima antes hahú aula, atu halo sensibilizasaun entre kolega sira kona-ba importánsia ekonomia azul no responsabilidade atu soe lixu iha fatin apropriadu.
Serimónia inaugurasaun ne’e halibur reprezentante Governu, instituisaun edukasaun, parseiru dezenvolvimentu no estudante sira, ho partisipasaun besik ema na’in 500.
(tom)
