DÍLI, STLTIMORLESTE.com – Seleksaun Nasionál Futebol Timor-Leste (TL) Sub-15 sofre derrota 0–6 hasoru Haiti iha kompetisaun FIFA U-15 World Cup & Festival 2026.
Partida ne’e hala’o iha Azerbaijão, domingu (25/10/2026), ne’ebé Haiti domina jogu husi inísiu to’o remata, ho vitória konvinsente hasoru Timor-Leste.
Haiti loke vantajen liuhosi golu Christopher Charles iha minutu 9, antes jogadór Timor-Leste, Ginaldo Da Silva, hatama golu kontra nia ekipa rasik iha minutu 16.
Golu rua ne’e fó vantajen 2–0 ba Haiti, ne’ebé kontinua hatudu dominasaun iha parte daruak.
Jogadór Haiti, John Laroque, aumenta vantajen liuhosi golu rua iha minutu 24 no 26, ne’ebé lori rezultadu ba 4–0.
Clavens Myrthil hatama golu kalima iha minutu 31, antes Aridou Benoit taka vitória Haiti ho golu neen iha minutu 38.
Ho rezultadu ne’e, Haiti hetan pontu tolu, enkuantu Timor-Leste kontinua la hetan pontu iha jogu rua ne’ebé relata ona.
Timor-Leste integra Grupu AF hamutuk ho Azerbaijão, Austrália, Haiti, Andorra no Israel, ne’ebé disputa fase grupu atu determina nivel kompetisaun ba fase tuirmai.
Derrota ne’e sai dezafiu ba Timor-Leste atu hadi’a organizasaun defensiva no kapasidade ofensiva, hodi prepara an ba partida sira tuirmai.
Tuir tabela klasifikasaun provizória ne’ebé disponivel, Azerbaijão no Austrália lidera grupu ho pontu neen, tuirfali Haiti ho pontu tolu.
Andorra no Israel iha pontu ida-idak, enkuantu Timor-Leste okupa pozisaun ikus ho pontu zero.
Tabela Klasifikasaun Provizória Grupu AF
| Pozisaun | Nasaun | Pontu |
|---|---|---|
| 1 | Azerbaijão | 6 |
| 2 | Austrália | 6 |
| 3 | Haiti | 3 |
| 4 | Andorra | 1 |
| 5 | Israel | 1 |
| 6 | Timor-Leste | 0 |
(leo)
