DILI, STLTIMORLESTE.com – Vise Xefe Estadu-Maior Jenerál F-FDTL, Major Jenerál Calisto Santos “Coliati”, partisipa semináriu kona-ba kontribuisaun juventude iha luta libertasaun nasionál.
Tuir komunikadu imprensa F-FDTL nian, ne’ebé STL asesu, Segunda-feira (26/10/2026), semináriu ne’e ho tema “Valoriza Luta Juventude Loriku Asuwain, ho Apoiu Igreja Katólika nian, ba Libertasaun Timor-Leste”.
Semináriu ne’e ho objetivu atu valoriza, rekoñese no preserva kontribuisaun istórika juventude Timoroan, liuliu jerasaun Loriku Asuwain ne’ebé envolve iha Frente Klandestina durante luta ba independénsia.
Atividade ne’e mós promove diálogu entre jerasaun rezisténsia no juventude ohin loron, hodi hametin patriotizmu, identidade nasionál, solidariedade no responsabilidade sivika.
Partisipante sira inklui Vise Xefe F-FDTL, Major Jenerál Calisto Santos “Coliati”, Komandante Komponente Naval no Komandante PNTL Munisípiu Dili, Komisáriu Asistente Polísia Orlando Gomes.
Ministru Asuntu Kombatente Libertasaun Nasionál, Gil Oan Soru, membru Parlamentu Nasionál, estudante eskola sekundária, universitáriu no lider relijiozu sira mós partisipa iha semináriu ne’e.
Prezensa autoridade, lider relijiozu no juventude sira iha semináriu ne’e reflete importánsia transmisaun istória luta libertasaun nasionál ba jerasaun foun.
Liu husi inisiativa ne’e, organizadór sira espera juventude bele komprende no preserva valór patriotizmu, solidariedade no sakrifísiu jerasaun uluk nian ba ukun-rasik-an Timor-Leste.
(jen)
