DILI, STLTIMORLESTE.com – Polísia Nasionál Timor-Leste (PNTL) Munisípiu Dili prepara ona planu seguransa hodi prevene konflitu durante selebrasaun Loron Finadu.
Komandante PNTL Munisípiu Dili, Komisáriu Asistente Polísia Orlando Gomes afirma katak, komandu munisipál simu ona orientasaun husi Komandu Jerál PNTL atu implementa planu seguransa ne’e.
“Ita prepara ona, hein de’it implementasaun atu koloka membru polísia sira iha semitériu sira iha Munisípiu Dili,” Orlando Gomes hatete.
Nia hato’o informasaun ne’e ba jornalista sira iha nia knaar-fatin, iha Dili, Segunda-feira (26/10/2026).
Orlando Gomes esplika katak, PNTL identifika ona semitériu balun ne’ebé konsidera nu’udar área risku, hodi koloka membru polísia atu prevene konflitu durante Loron Matebian.
Planu seguransa ne’e sei envolve Unidade Espesiál Polísia (UEP), Unidade Polísia Marítima (UPM) no Forsa Defeza Timor-Leste (F-FDTL) atu apoia operasaun seguransa.
“Sira tenke fó apoiu atu ita bele garante seguransa durante Loron Finadu, nune’e atividade sira bele la’o ho di’ak,” nia afirma.
Komandante ne’e subliña katak, kolokasaun membru polísia sei bazeia ba nivel risku iha semitériu sira, hodi asegura komunidade bele hala’o atividade ho hakmatek.
Entretantu, akademista Universidade Nasionál Timor Lorosa’e (UNTL), José Costantino Ximenes, husu PNTL no F-FDTL atu garante seguransa másimu durante selebrasaun Loron Matebian.
“Loron Matebian besik ona, tanba ne’e husu PNTL no F-FDTL atu garante seguransa, hodi prevene konflitu ne’ebé bele hamosu kanek no mate,” nia afirma.
José Costantino alerta katak, ema balun bele aproveita selebrasaun Loron Matebian atu hemu tua no provoka malu, ne’ebé bele hamosu konflitu no vítima.
Tanba ne’e, nia husu komunidade atu mantein dame, evita provokasaun no koopera ho autoridade seguransa, hodi garante selebrasaun Loron Finadu la’o ho hakmatek.
(jen)
