DILI, STLTIMORLESTE.com – Ministériu Saúde (MS) halo ona abatisasaun no fomigasaun ba uma-kain hamutuk 238.398 iha Timor-Leste, hodi prevene moras dengue.
Diretór Edukasaun Promosaun Saúde MS, Jaime Belo, informa katak atividade hirak-ne’e hala’o durante Janeiru to’o 13 Outubru 2026, iha munisípiu sira inklui Rejiaun Administrativa Espesiál Oe-Cusse Ambeno (RAEOA).
“Husi Janeiru to’o 13 Outubru, ita halo ona abatisasaun no fomigasaun ba uma-kain hamutuk 238.398 iha Timor-Leste,” Jaime Belo hatete.
Nia hato’o informasaun ne’e ba jornalista sira iha nia servisu-fatin, Caicoli, Dili, segunda-feira (26/10/2026).
Jaime Belo esplika katak, Ministra Saúde orienta ona preparasaun produtu kimiku ba abatisasaun no fomigasaun, hodi antecipa tempu udan no hamenus risku propagasaun dengue.
“Estoke kimiku ba fomigasaun no abatisasaun sei sufisiente, tanba parseiru sira kontinua fó apoiu,” nia afirma.
Nia husu autoridade saúde munisipál sira atu hato’o pedidu ba MS bainhira produtu kimiku falta, hodi asegura distribuisaun ba ekipa sira.
Atualmente, MS kontinua hala’o intervensaun prevensaun dengue iha Bobonaro, Covalima, Ataúro no Dili, liuhusi fomigasaun no distribuisaun produtu abatisasaun.
Ba munisípiu sira seluk, situasaun sei normál. Maski nune’e, ekipa saúde kontinua alerta autoridade munisipál sira atu identifika área risku no hala’o prevensaun sedu.
MS mós husu munisípiu sira atu hahú medida prevensaun bainhira tempu udan hahú, hodi hamenus risku transmisaun dengue iha komunidade.
Tuir dadus ne’ebé Jaime Belo aprezenta, Dili rejista númeru aas liu, ho uma-kain 70.350 hetan abatisasaun no 50.442 hetan fomigasaun.
Iha Baucau, uma-kain 10.055 hetan abatisasaun no 7.086 hetan fomigasaun, enkuantu Bobonaro rejista 8.678 ba abatisasaun no 5.577 ba fomigasaun.
Ermera rejista uma-kain 7.261 ba abatisasaun no 3.010 ba fomigasaun, enkuantu Ataúro rejista 5.790 ba abatisasaun no 1.762 ba fomigasaun.
Iha Manufahi, uma-kain 5.437 hetan abatisasaun no 1.939 hetan fomigasaun, enkuantu RAEOA rejista 5.283 ba abatisasaun no 5.037 ba fomigasaun.
Viqueque rejista uma-kain 4.265 ba abatisasaun no 5.869 ba fomigasaun, enkuantu Covalima rejista 3.879 ba abatisasaun no 5.227 ba fomigasaun.
Iha Ainaro, uma-kain 3.787 hetan abatisasaun no 2.306 hetan fomigasaun, enkuantu Liquiça rejista 3.547 ba abatisasaun no 941 ba fomigasaun.
Lautém rejista uma-kain 2.860 ba abatisasaun no 8.549 ba fomigasaun, enkuantu Aileu rejista 2.651 ba abatisasaun no 3.473 ba fomigasaun.
Manatuto rejista uma-kain 2.495 ba abatisasaun no 842 ba fomigasaun, tuir dadus Ministériu Saúde nian.
Iha fatin ketak, moradora Suku Comoro, Maria Banca dos Santos, husu MS atu intensifika atividade prevensaun dengue molok tempu udan hahú.
“Ita presiza fomigasaun, tanba se udan monu, susuk sei barak no bele aumenta risku atu hetan moras dengue,” Maria afirma.
Nia husu MS atu hala’o abatisasaun no fomigasaun ba uma-kain sira sedu, hodi proteje komunidade husi moras dengue durante tempu udan.
(jen)
