ZUMALAI, STLTIMORLESTE.com – Ministériu Edukasaun (ME) konsidera katak Ministériu Administrasaun Estatál (MAE) mak iha responsabilidade no hatene liután kona-ba progresu konstrusaun dapur ba programa merenda eskolár iha eskola sira, tanba projetu konstrusaun ne’e implementa liuhusi Programa Nasional Dezenvolvimentu Suku (PNDS).
Xefe Departamentu Programa Merenda Eskolár iha ME, Belchior Maria Almeida Barros hato’o informasaun ne’e ba STL, Kuarta-feira (04/11/2026).
“Hau hanoin katak parte munisípiu mak hatene liután kona-ba konstrusaun dapur ba programa merenda eskolár, tanba projetu ne’e pertense ba PNDS. Nune’e, progresu konstrusaun ne’ebé lao ka seidauk lao, sira mak hatene liután,” Belchior dehan.
Nia esplika katak, tanba konstrusaun dapur merenda eskolár ne’e hala’o liuhusi PNDS, MAE no autoridade munisipál sira mak iha informasaun kona-ba progresu obra iha eskola sira.
Iha parte seluk, Koordenadora EBF Naroman, Joana Teresa Freitas informa katak, konstrusaun dapur merenda eskolár iha eskola ne’e seidauk remata, tanba obra ne’e hala’o liuhusi programa PNDS.
Nia hatete katak, tuir nesesidade eskola nian, iha tinan ida-ne’e sei konstrui refetóriu ba EBF rua iha Suku Bairro Pite, mak EBF Naroman no EBF Fatumeta.
“Programa merenda eskolár lao hanesan baibain. Fornesedór sira tein uza ai-sunu tanba númeru estudante barak. Iha fornesedór na’in lima ne’ebé prepara merenda ba estudante sira, no loron ida tein dala rua,” Joana esplika.
Nia hatutan katak, menu merenda eskolár ne’e bazeia ba orientasaun menu ne’ebé Servisu Edukasaun Munisipál Dili fó. Estudante hamutuk besik 800 iha EBF Naroman asesu ba programa merenda eskolár.
Joana mós informa katak, tuir planu, konstrusaun dapur merenda eskolár ne’e sei remata no entrega ba eskola iha fulan Novembru ne’e, atu nune’e fornesedór sira bele uza dapur foun hodi prepara hahán ba estudante sira.
“Fulan ne’e konstrusaun dapur merenda eskolár ami nian sei finaliza, atu fornesedór sira bele uza dapur foun hodi tein merenda ba estudante sira, tanba agora konstrusaun besik remata ona,” nia dehan.
Enkuantu ne’e, xefe fornesedór iha EBF Naroman, Adelina Soares, dehan katak kada loron sira prepara hahán ba estudante sira dala rua, tuir oráriu tama estudante nian.
“Ami tein uza ai-sunu tanba dapur foun seidauk remata. Agora ami kontinua uza dapur tuan hodi prepara merenda eskolár ba estudante sira. Ami na’in lima mak tein ba estudante sira,” Adelina informa.
Nia akresenta katak, estudante sira simu merenda eskolár tuir oras ne’ebé determina ona, no fornesedór sira prepara hahán tuir menu ne’ebé hakerek iha manual.
(jac)
