DILI, STLTIMORLESTE.com – Polísia Nasional Timor-Leste (PNTL) Munisipiu Dili rejista kazu krime haat durante selebrasaun loron finadu, 1 no 2 Novembru 2026.
Komandante PNTL Munisipiu Dili, Komisáriu Asistente Polísia Orlando Gomes informa katak kazu hirak ne’e akontese iha lokalidade diferente iha Dili.
Nia dehan, kazu hirak ne’e inklui violénsia doméstika iha Bedois, Becora no Santa Cruz, ofensa simples iha Raikotu no Metinaro, koasaun seksuál iha Dom Aleixo, ameasa ho arma kro’at iha Kulau, Becora no furtu agravadu iha Ailok-Laran.
Orlando Gomes afirma katak PNTL konsege identifika no detein suspeitu na’in haat relasiona ho kazu hirak ne’e.
“Ita detein suspeitu na’in haat durante oras 72 no prepara auto-notísia atu aprezenta ba Ministériu Públiku,”hateten Komandante PNTL Munisipiu Dili, Komisáriu Asistente Polísia Orlando Gomes, ba jornalista sira iha Eskadra Dom Aleixo, Kuarta-feira (04/11/2026).
Nia mós informa katak, durante loron finadu, PNTL halo identifikasaun ba sidadaun ida durante oras 12 tanba kondisaun lanu.
Maibé, depois halo prosedimentu identifikasaun, polísia husik sidadaun ne’e atu fila ba uma.
Komandante ne’e kompara ho tinan sira liubá, ne’ebé PNTL detein suspeitu entre ema na’in 10 to’o 20 durante loron finadu.
“Tinan ida ne’e membru sira servisu maka’as no kumpre orden komandu nian atu garante seguransa durante loron finadu,” nia informa.
Nia apresia esforsu membru PNTL sira hotu ne’ebé servisu hamutuk hodi mantein orden no seguransa públika durante selebrasaun loron finadu.
Iha fatin ketak, Xefe Suku Vila-Verde, Abdul Mancoli Informa, durante loron finadu iha Suku Vila Verdi laiha probelma entre joven nomos Komunidade, tanba komunidade hotu-hotu halao pereparasaun ba loron Matebian no ida-idak ba semiteriu hodi hamos Semiteriu no dia 2 sira lao hakmatek ba kari aifunan no sunu lilin.
“Iha hau nia Suku durante loron finadu no ate agora situasaun lao hakmatek, loron Finado ida-idak ba rate hodi kari aifunan,”nia afirma.
(jen)
