DÍLI, STLTIMORLESTE.com – Governu Timor-Leste liuhusi Ministériu Juventude, Desportu, Arte no Kultura (MJDAK), aloka osamentu hamutuk US$ 100.000 hodi realiza selebrasaun Loron Nasionál Juventude ba dala 21 no komemorasaun Loron Masakre Santa Cruz ba dala 35 iha tinan 2026.
Diretór Nasionál ba Dezenvolvimentu Juventude, João Lemos hateten ba jornalista STL iha sede MJDAK katak, selebrasaun ba loron importante rua ne’e sei realiza iha fatin diferente.
Nia esplika katak, selebrasaun Masakre Santa Cruz sei foka iha Díli, enkuantu selebrasaun Loron Nasionál Juventude sei hala’o iha Munisípiu Manatuto, inklui mós iha postu administrativu hotu-hotu iha territóriu Timor-Leste.
João Lemos hatutan katak, osamentu US$ 100.000 ne’e fahe ba parte tolu, tuir nesesidade atividade sira ne’ebé sei realiza.
Ba komemorasaun Masakre Santa Cruz iha Díli, MJDAK aloka US$ 20.000. Enkuantu ba selebrasaun Loron Nasionál Juventude iha Munisípiu Manatuto, aloka US$ 30.000.
Parte seluk, US$ 50.000, destina ba postu administrativu hotu-hotu iha territóriu Timor-Leste tomak, hodi permite juventude sira iha nivel lokál partisipa iha komemorasaun loron importante rua ne’e.
Alokasaun osamentu ne’e sei suporta realizasaun atividade sira hodi komemora kontribuisaun juventude ba nasaun no hanoin nafatin istória luta no sakrifísiu povu Timor-Leste iha Masakre Santa Cruz.
(leo)
