BAUCAU, STLTIMORLESTE.com – Koordenadora EBF Belavista preokupa lokalizasaun área eskola ne’ebé seidauk klaru, ne’ebé impede hadi’a no dezenvolve infraestrutura eskola.
Koordenadora Eskola Bazika Filial (EBF) Primeiru no Segundu Siklu Belavista, Baukau Vila, Cesarina de Jesus Gusmão, hato’o preokupasaun ne’e ba STL iha Builai, Kuarta-feira (04/11/2026).
Nia dehan, to’o agora eskola seidauk iha área rasik tanba komunidade okupa fatin ne’ebé uluk uza hanesan kazerna profesór.
“Planu atu harii lutu eskola iha, maibé problema mak lokalizasaun área eskola seidauk klaru tanba komunidade okupa ona fatin ne’e”, dehan Cesarina.
Nia esplika katak durante tinan sira nia bolu ona inan-aman, veteranu, xefe suku no xefe aldeia atu rezolve problema área eskola, maibé seidauk hetan rezultadu.
Tanba limitasaun fatin, nia difikuldade atu halo ambiente eskola sai verde no organiza infraestrutura ne’ebé estudante sira presiza.
Cesarina dehan, maski iha limitasaun, nia uza osan konsesaun eskolar atu sosa arame hodi halo lutu balun, maibé servisu seluk presiza apoiu komunidade.
Nia mós informa katak problema área eskola ne’e aprezenta ona ba Ensinu Baziku Sentral no Ensinu Baziku Nasionál atu hetan solusaun.
Nia iha planu atu harii edifísiu Jardim Infánsia (TK) ketak, maibé presiza define uluk fatin ne’ebé bele uza hamutuk ho EBF Belavista.
Iha fatin hanesan, estudante EBF Belavista, Melcia Sarmento, hato’o preokupasaun kona-ba kondisaun edifísiu eskola ne’ebé aat, liuliu plafon triplek ne’ebé hahú monu.
Nia dehan, ai-eten balun iha plafon mós dodok ona, ne’ebé bele hamosu perigu ba estudante sira durante prosesu aprendizajen.
Melcia husu Governu, liuhusi Ministériu Edukasaun, atu halo reabilitasaun ba edifísiu eskola iha tempu badak.
Nia hakarak estudante sira bele kontinua aprendizajen ho seguru no hakmatek, la presiza preokupa kona-ba plafon ne’ebé bele monu bainhira udan no anin maka’as.
(joa)
