BAUCAU, STLTIMORLESTE.com – Koordenadora EBF Belavista husu Ministeriu Edukasaun (ME) reabilita edifísiu eskola tolu ne’ebé kondisaun aat, tanba ameasa seguransa no prosesu aprendizajen estudante sira.
Koordenadora EBF Belavista, Cesarina de Jesus Gusmao, hato’o pedidu ne’e ba STL iha Builai, Baukau Vila, kuarta-feira (4/11/2026).
Nia esplika katak edifísiu eskola tolu iha kondisaun aat, tanba ai-leten no plafon triplek balun dodok, nakloke no monu ona.
Kondisaun ne’e halo estudante sira la hetan ambiente seguru no saudável atu kontinua prosesu aprendizajen iha eskola.
“Hau husu Governu, liuhusi Ministeriu Edukasaun, atu tau matan ba EBF Belavista, liuliu edifísiu segundu, tanba sala aula la to’o ba estudante,” dehan Cesarina.
Nia hatutan katak, bainhira udan, bee tama ba sala aula tanba uma-boot nia ai-lete nakloke ona.
Situasaun ne’e difikulta estudante sira atu aprende ho di’ak, tanba ambiente eskola la seguru no confortável.
Koordenadora ne’e mós preokupa katak ai-leten no plafon triplek dodok bele monu ba estudante sira bainhira udan no anin maka’as.
“Hau sente preokupada tanba tauk ai-leten ka triplek monu derepente ba estudante sira bainhira udan no anin maka’as,” nia dehan.
Cesarina afirma katak edifísiu eskola ne’e hahú nakloke ona husi 2024, maibé to’o agora seidauk hetan reabilitasaun.
Nia husu Ministeriu Edukasaun atu inklui reabilitasaun EBF Belavista iha planu tinan oin, hodi hadi’a kondisaun infraestrutura eskola.
Nia enfatiza katak reabilitasaun importante tebes, liuliu atu hadi’a plafon ne’ebé dodok, no asegura seguransa estudante sira durante atividade aprendizajen.
(joa)
