BAUCAU, STLTIMORLESTE.com – Eskola Ensinu Baziku Filial (EBF) Primeiru no Segundu Siklu Belavista enfrenta kondisaun dapur merenda eskolar ne’ebé ladun diak, hodi sai obstákulu ba preparasaun hahán saudavel ba estudante sira.
Preokupasaun ne’e hato’o husi Koordenadora EBF Belavista, Cesarina de Jesus Gusmão ba STL iha Builai, Kuarta (4/11/2026).
Cesarina hatete, dapur ne’ebé uza hodi prepara hahán ba estudante sira iha programa merenda eskolar, harii iha tinan 2005 no to’o agora seidauk hetan hadi’a.
“Husi tinan 2005 to’o agora, dapur kontinua iha kondisaun ne’ebé la diak. Bebak dodok ona, prega kalen, no didin balun monu. Ami sujere ona ba Ministériu Edukasaun atu hadi’a dapur ne’e, tanba estudante sira presiza merenda eskolar ne’ebé prepara iha fatin ne’ebé diak,” dehan nia.
Nia hatutan katak, ema na’in rua mak prepara hahán ba estudante sira kada loron. Maibé, kondisaun dapur ne’ebé ki’ik no aat halo prosesu preparasaun hahán sai difisil.
Nia esplika katak, dapur ne’ebé ladun diak bele afeta mos limpeza no saúde estudante sira nian, tanba bee no fatin preparasaun hahán seidauk iha kondisaun apropriadu.
Cesarina dehan, dapur ne’e iha ona problema didin no bebak, no iha laran ai-tama no balde ne’ebé uza hodi prepara hahán. Eskola mos seidauk iha lutu, nune’e ai-sunu ne’ebé tau iha liur bele lakon bainhira dadeer mai.
Tanba ne’e, nia husu ba Ministériu Edukasaun atu konstrui ka hadi’a dapur ne’ebé apropriadu, ho bee no fatin preparasaun hahán ne’ebé moos, atu bele asegura merenda eskolar saudavel ba labarik sira.
Iha parte seluk, nia dehan katak, estudante sira la iha fatin apropriadu atu simu no han merenda eskolar. Tanba ne’e, estudante sira tenke hamriik iha varanda eskola nian, iha mahon, hodi simu hahán.
Nia husu atu hadi’a kondisaun dapur no fatin fahe merenda eskolar, atu estudante sira bele simu no han hahán iha ambiente ne’ebé moos, seguru no saudavel.
(joa)
