BAUCAU, STLTIMORLESTE.com – Eskola Bazika Filial (EBF) Primeiru no Segundu Siklu Belavista preokupa tanba to’o agora seidauk iha seguransa eskola.
Preokupasaun ne’e hato’o husi Koordenadora EBF Belavista, Cesarina de Jesus Gusmão ba STL iha Builai, Kinta (5/11/2026).
Cesarina de Jesus Gusmão dehan, eskola hotu-hotu presiza hetan seguransa husi governu, atu bele tau matan ba fasilidade eskola no prevene estragus ne’ebé bele akontese.
“Ami-nia eskola laiha seguransa, janela eskola hetan estragus tanba ema tuda fatuk no fera. Osan koncesaun eskola nian uza hodi hadi’a buat barak, maibé estragus kontinua akontese tanba laiha seguransa,” dehan nia.
Nia hatutan katak, kondisaun eskola ne’ebé seidauk iha seguransa sai preokupasaun boot, tanba eskola refere seidauk iha mura, ne’ebé bele prevene ema tama no estraga fasilidade eskola.
Tanba ne’e, nia husu ba governu atu haree no buka solusaun hodi tau seguransa iha eskola, atu fasilidade sira bele hetan protesaun no estudante sira bele kontinua aprende iha ambiente ne’ebé seguru.
(joa)
