BAUCAU, STLTIMORLESTE.com – Eskola Ensinu Baziku Central (EBC) 3 Siklu Wailili hahú prepara pontus ezame terseiru períodu, ne’ebé sei hala’o iha loron 23 Novembru 2026, ba estudante Sira.
Informasaun ne’e hato’o husi Diretor EBC Wailili, Marcelino Diego Marques ba STL iha Wailili, Kinta (05/11/2026).
Diretor ne’e dehan katak, preparasaun ba ezame terseiru períodu hahú ona, inklui prepara no imprime pontus ezame ba estudante sira.
“Preparasaun ba ezame terseiru períodu ami hahú ona, inklui prepara pontus ezame ba setimu no oitavu anu, ne’ebé sei hala’o iha loron 23 Novembru 2026,” dehan nia.
Nia hatutan katak, estudante na’in 126 mak sei tuir ezame terseiru períodu ne’e.
Relasiona ho ezame ne’e, nia fó hanoin ba estudante sira atu estuda ho seriedade, hodi bele hetan valor ne’ebé di’ak no pasa ba klase tuir mai.
Nia esplika katak, sistema kuríkulu foun, ne’ebé bazeia ba avaliasaun siklu 21, komesa implementa ba klase setimu no iha tinan ida ne’e kontinua ba klase oitavu.
Tanba ne’e, estudante klase oitavu iha tinan 2026 mak ikus ne’ebé tuir kuríkulu antigu.
Estudante ne’ebé la pasa ezame klase oitavu, sei tenke fila fali ba klase setimu, tanba kuríkulu foun.
Nia husu ba estudante sira atu prepara an ho di’ak ba ezame terseiru períodu, atu bele hetan rezultadu ne’ebé di’ak no kontinua ba klase tuir mai.
(joa)
