DILI, STLTIMORLESTE.com – SEI Abertura esposizaun produtu grupu feto hosi munisípiu 12 no RAEOA, iha CCD, hodi komemora Loron Nasionál Feto ba dala 50.
Sekretaria Estadu ba Igualdade (SEI), ohin loron Sesta, 6 Novembru 2026, abertura Esposizaun Produtu Grupu Feto iha Sentru Konvensaun Dili (CCD).
Esposizaun ne’e envolve grupu feto hosi munisípiu 12 no Rejiaun Administrativa Espesiál Oe-Cusse Ambeno (RAEOA), nu’udar parte husi atividade komemorasaun Loron Nasionál Feto Timor-Leste ba dala 50.
Ministra Solidariedade Sosiál no Inkluzaun, ne’ebé hala’o mós kna’ar Interina Sekretária Estadu ba Igualdade, Verónica das Dores, mak inaugura atividade ne’e.
Nia akompaña husi Vise-Prezidente Komisaun Organizadora, ne’ebé nu’udar Diretór-Jerál SEI, Armando da Costa, Inspetora no Auditora SEI, Benigna Maria Amaral, Xefe Gabinete SEI, Srilia Tilman Cardoso, dirijente sira no parseiru dezenvolvimentu.
Esposizaun ne’e nia objetivu mak atu promove no valoriza produtu lokál ne’ebé grupu feto sira prodús iha munisípiu no RAEOA.
Iha diskursu abertura, Ministra Verónica das Dores hato’o apresiasaun ba grupu feto sira ne’ebé mai husi komunidade oioin atu aprezenta sira-nia produtu, kreatividade, abilidade no dedikasaun.
Nia hateten katak, esposizaun ne’e la’ós de’it fatin atu hatudu no fa’an produtu, maibé mós espasu atu rekoñese kontribuisaun feto sira nian ba ekonomia família no nasaun.
Esposizaun ne’e mós buka hametin ligasaun entre produsaun lokál, merkadu no konsumidór, hodi kria oportunidade rendimentu no empregu ba família sira.
“Iha produtu ida-idak, ita haree feto sira-nia koñesimentu, inovasaun, dedikasaun no kapasidade atu transforma rekursu lokál sai valór ekonómiku,” dehan Ministra.
Ministra subliña katak, Governu, liuhosi SEI, reafirma kompromisu atu kontinua apoia grupu feto, liuliu feto rurál no grupu vulnerável, hodi haforsa ekonomia uma-kain.
Nia esplika katak, apoiu ba feto sira la’ós de’it iha forma osan, maibé inklui formasaun, akompañamentu tékniku, literasia finanseira, jestaun negósiu no asesu ba merkadu.
Kompromisu ne’e mós alinha ho Deklarasaun Maubisse Faze Daruak, períodu 2023–2028, ne’ebé hametin kooperasaun entre Governu, liña ministeriál sira no BNCTL.
Deklarasaun ne’e promove moris-di’ak no empoderamentu sosiál-ekonómiku feto rurál, inklui feto ho defisiénsia, liuhosi asesu ba rekursu, formasaun no oportunidade ekonómika.
Ministra mós hateten katak, empoderamentu ekonómiku feto iha ligasaun direta ho prevensaun violénsia doméstika no violénsia bazeia ba jéneru.
Tuir nia, bainhira feto iha rendimentu, asesu ba rekursu no kapasidade atu foti desizaun, sira bele hametin autonomia no seguransa ekonómika.
Iha mensajen enkorajamentu, Ministra husu ba grupu feto sira atu kontinua hadi’a kualidade produtu, embalajen no marka, buka merkadu foun no fahe esperiénsia ho grupu seluk.
Nia konsidera produtu lokál nu’udar patrimóniu no potensialidade ekonómika Timor-Leste nian.
Nune’e mós faan na’in ou grupu Rede suru Na’in, Josefina Soares Guterres husi Munisípiu Baucau
husi Munisípiu mai Dili loron rua ona no produtu ne’ebé faan mak tais nomos produtu lokál.
“Ami nia tais sira ne’e ema la sosa hotu sosa mak kolega sira husi Bobonaro faan Brinkus, Korente, tais ne’e ema la hola ida,” katak nia.
Nia hatete, mai sente susar tanba loron manas, lakon tempu maibé ema la sosa sira nia produtu ne’ebé sira faan.
Nia mós rekomenda bainhira kria fali Esposizaun komisaun presiza prepara bee ruma ba faan na’in sira nomos hahán, tanba durante Kinta no Sesta ema la prepara ai-han ba sira no sira rasik na’in sosa hahán ba han.
Esposizaun ne’e partisipa husi grupu feto hosi munisípiu 12 no RAEOA, inklui grupu artezanatu no hortikultura hosi Munisípiu Aileu.
(eme)
