DÍLI, STLTIMORLESTE.com – Tribunal Dili absolve arguidu JdS, eis Vice-Ministru Negósiu Estranjeiru no Kooperasaun, husi akuzasaun burla agravada, tanba faktus prinsipál la prova.
Tribunal absolve husi akuzasaun krime burla agravada, depois de konsidera katak faktus kona-ba kontaktu direta ho ofendidu BL no pedidu osan US$5.000 la prova durante julgamentu.
Advogadu privadu Ismael Asunsao Lopez, iha deklarasaun ba jornalista sira afirma katak, Tribunal konsidera provadu de’it arguidu nia pozisaun nu’udar Vice-Ministru no nia hasoru malu ho testemuña AdSC no RLG.
“Faktus ne’ebé la provadu mak arguidu hasoru malu diretamente ho lezadu no husu osan US$5.000. Tanba ne’e, Tribunal absolve arguidu husi krime burla agravada,” deklara advogadu iha loron Tersa (10/11/2026).
Tribunal mós la simu pedidu Ministériu Públiku (MP) atu altera kualifikasaun jurídika husi krime burla agravada ba korupsaun pasiva.
MP husu alterasaun ne’e tanba konsidera katak arguidu simu osan US$5.000 husi ofendidu, ho promessa atu ajuda nia sai Embaixador iha nasaun seluk.
Tribunal mos deklara konaba indimizasaun osan, ofendidu bele hatama fali prosesu sivil hasoru arguidu no sasin sira.
Antes nee iha alegasaun, Prokuradór Nelson Magno, durante alegasaun afirma katak ofendidu entrega duni osan US$5.000 ba arguidu durante nia mandatu nu’udar Vice-Ministru MNEC.
MP konsidera katak, entrega osan ne’e iha relasaun ho promessa atu nomeia ofendidu sai Embaixador iha nasaun seluk.
Tanba ne’e, MP husu Tribunal atu altera kualifikasaun jurídika ba korupsaun pasiva no kondena arguidu ho pena prizaun tinan lima.
Enkuantu, Advogadu Ismael Asunsao Lopez afirma katak arguidu la hasoru malu ho ofendidu BL, maibé hasoru malu ho testemuña RLG no AdSC atu koalia kona-ba projetu.
Defeza mós afirma katak, arguidu nunka husu osan ba testemuña AdSC no la iha kompeténsia atu nomeia sidadaun Timor oan sai adidu ka Embaixador.
Defeza husu Tribunal atu absolve arguidu, no kontinua mantein pedidu ne’e maski la opoin alterasaun kualifikasaun jurídika ne’ebé MP propoin.
Tuir faktus iha akuzasaun, iha tinan 2020, ofendidu BL koñese arguidu liuhusi nia alin RLG, ne’ebé koñese AdSC, asesór no membru partidu KHUNTO.
Iha 27 Jullu 2020, RLG informa ofendidu atu prepara Curriculum Vitae (CV) no osan US$ 5.000 atu entrega iha fatin servisu arguidu nian, MNEC, Pantai Kelapa, Dili.
Iha 30 Jullu 2020, ofendidu halo levantamentu osan US$5.000 iha Banku BNCTL atu lori ba entrega tuir promessa ne’ebé iha.
Akuzasaun afirma katak, iha loron hanesan, por volta 14h00, ofendidu BL hamutuk ho RLG no AdSC entrega osan US$5.000 iha edifísiu MNEC.
MP konsidera katak, osan ne’e entrega atu ofendidu bele hetan pozisaun Embaixador, maibé promessa ne’e la kumpre.
Kona-ba indemnizasaun sivíl, MP la husu espesifikamente atu arguidu devolve osan US$5.000.
Tribunal orienta ofendidu atu bele hatama prosesu sivíl kontra arguidu, hodi aprezenta testemuña no prova kona-ba osan ne’e.
Prosesu ne’e prezididu husi Juiz Arjentino Nunes, ho Juiz Ivan Patrocénio nu’udar adjuntu no juíza estajiária ida. MP reprezenta husi Prokuradór Nelson Magno, enkuantu arguidu hetan asisténsia jurídika husi advogadu privadu Ismael Asunsao Lopez.
(ter)
