DÍLI, STLTIMORLESTE.com – Tribunal julga kazu falsifikasaun dokumentu ne’ebé kauza Estadu RDTL prejuízu US$19.780 hosi pensaun Mártir Domingos.
Arguida M enfrenta akuzasaun falsifikasaun dokumentu no notasaun téknika, tuir artigu 303 Kódigu Penál, tanba uza dokumentu falsu atu hetan pensaun Mártir Domingos nian.
Tuir akuzasaun, iha tinan 2003, Estadu RDTL loke rejistu ba funu-nain no ema sira ne’ebé partisipa iha luta ba libertasaun nasional, inklui mártir sira iha Suco Asu-lau, Postu Administrativu Hatulia, Munisípiu Ermera.
AdC, ne’ebé nu’udar maun ka alin hosi Mártir Domingos, iha direitu atu simu pensaun mártir nian. Maibé, iha tinan 2011, nia hetan ona rekonhesimentu nu’udar benefisiáriu ba pensaun mártir seluk, nune’e labele simu pensaun Mártir Domingos nian.
Komisaun informa katak, pensaun Mártir Domingos, ho númeru MFAA 10693, atribui ba M nu’udar benefisiária. Arguida hahú simu osan refere iha fulan Jullu 2013, liuhosi BNCTL iha Dili.
Tuir akuzasaun, iha 11 Juñu 2013, arguida aprezenta dokumentu sira, inklui sertidaun batizmu, dokumentu CRDTL no ficha mártir, atu hatudu katak nia mak aman hosi Mártir Domingos.
Maibé, arguida konfesa iha tribunal katak nia nunka simu sakramentu batizmu tuir fiar Katólika no la iha relasaun parentesku ho Mártir Domingos.
Iha 7 Jullu 2020, verifikasaun hosi autoridade kompetente konfirma katak arguida laiha direitu atu simu pensaun refere. Ministériu dos Assuntos dos Combatentes da Libertação Nacional konsequentemente suspende nia benefísiu.
Tuir akuzasaun, entre 2013 no 2020, arguida simu total osan US$19.780, ne’ebé kauza prejuízu ba Estadu RDTL.
Iha julgamentu, arguida deklara katak sidadaun ida naran Mautinu mak trata dokumentu sira ne’e, inklui alterasaun ba dokumentu, no nia la iha koñesimentu kona-ba falsifikasaun.
Arguida mós afirma katak, Mautinu mak foti osan pensaun kada fulan no fahe ho nia, maibé nia hetan de’it parte ki’ik. Nia hatete katak osan primeiru ne’ebé simu hamutuk US$15.
Arguida deklara katak, to’o agora nia la hatene ona paradeiru Mautinu.
Iha sala julgamentu, arguida konfirma katak akuzasaun ne’e loos, maibé esplika katak nia la iha koñesimentu kona-ba dokumentu falsifikadu no husik responsabilidade prosesamentu dokumentu ba Mautinu.
Ministériu Públiku akuza arguida nu’udar autora material, ho forma konsumada, ba krime falsifikasaun dokumentu no notasaun téknika, tuir artigu 303 Kódigu Penál.
Depois rona deklarasaun arguida, tribunal marka kontinua audénsia julgamentu ba 23 Novembru 2026.
Julgamentu ne’e prezide hosi juízes koletivu Jumiati Freitas, José Gonçalves no José Quintão. Ministériu Públiku reprezenta hosi prokuradór Domingos Barreto, no arguida hetan asisténsia hosi Defensór Públiku.
(ter)
