DÍLI, STLTIMORLESTE.com – Joven sira presiza kontinua dezenvolve koñesimentu, teknolojia no kapasidade linguístika atu responde ba ezijénsia kampu servisu iha mundu ohin loron.
Mensajen nee hatoo husi Koodenador Gabinete de Apoiu Sosiadade Sivíl (GASC), Joaquim da C. Freitas ba jornalista sira iha salaun Universidade Dili (UNDIL), Tersa (10/11/2026).
Nia husu joven sira atu prepara an ho di’ak liu husi dezenvolve koñesimentu, teknolojia no kapasidade linguístika, hodi bele kompete no responde ba ezijénsia mundu servisu iha tempu atual.
Nia esplika katak, kada jerasaun iha esperiénsia moris no responsabilidade diferente tuir ninia tempu.
Iha tempu uluk, sira ne’ebé moris iha periodu juventude, la’ós foka de’it ba estudu, maibé mós dedika tempu no enerjia hodi partisipa iha luta rezisténsia atu konkista independénsia Timor-Leste.
Maibé, ba jerasaun joven ohin loron, nia husu atu uza oportunidade ne’ebé iha hodi prepara an ho koñesimentu no kapasidade ne’ebé presiza.
Nia dehan, mundu ohin loron la’ós kompetisaun entre ema de’it, maibé kompetisaun iha área teknolojia, koñesimentu no kapasidade.
Tanba ne’e, joven sira tenke kontinua aprende no forma an, atu sai prontu enfrenta kompetisaun iha futuru.
Tanba kampu servisu ohin loron ezije ema atu iha koñesimentu teknolojia, koñesimentu linguístiku no kapasidade profisionál, hodi bele responde ba nesesidade instituisaun no merkadu servisu.
“Ba joven sira hotu, imi iha tempu tomak atu prepara imi-nia an ho koñesimentu sira ne’ebé kampu servisu ezije, tanba mundu ohin loron presiza ema ne’ebé iha kapasidade no prontidaun atu servisu,” dehan Joaquim.
Nia aumenta katak, jerasaun uluk hamutuk lori nasaun ne’e to’o ukun an, maibé responsabilidade atu dezenvolve nasaun kontinua sai knaar hamutuk, liuhusi fahe informasaun no esperiénsia ba jerasaun foun.
Nune’e, nia espera katak joven sira bele simu no kontinua dezenvolve mensajen no esperiénsia husi jerasaun uluk, atu iha futuru bele lori responsabilidade ba nasaun no kontinua harii Timor-Leste.
(joa)
