DÍLI, STLTIMORLESTE.com – Indonézia sei hala’o eventu Indonesian Day 2026 iha Timur Plaza, Dili, iha loron 21 Novembru 2026, ho objetivu atu haforsa amizade no kooperasaun entre Indonézia no Timor-Leste liuhusi kultura no ekonomia.
Infornasaun nee hatoo husi Prezidente Komisaun Organisator Indonesian Day 2026, Banga Malewa hateten ba Jornalista sira iha Embaixada Repúblika Indonézia Palasiu Dili, Sesta (13/11/2026) hafoin Realiza enkontru ho Ekipa Komisaun katak, eventu ne’e sei dedika ba amizade entre nasaun rua, Indonézia-Timor-Leste ne’ebé sei partisipa husi Prezidente Repúblika (PR) Jose Ramos Horta ho Primeiru-Ministru Timor-Leste, Kay Rala Xanana Gusmão hamutuk ho komunidade no públiku jerál.
Nia esplika, Komisaun Organizadór sei loke portão ba públiku hahú tuku 15:00, no entre tuku 15:00 to’o 16:30 sei hala’o atividade fahe prémiu gratuitu liuhusi kuiz no door prize.
Prémiu sira ne’e inklui billete aviaun Dili–Bali, komputadór portátil, frigorífiku, máquina fase roupa no premium seluk tan, ne’ebé sei fó ba partisipante sira.
“Se Maluk Timor oan ho Indonézia oan sira hakarak hetan prémiu barak, mai sedu hahú tuku tolu lokraik, tanba entre tuku tolu to’o haat no balu sei iha kuiz no fahe prémiu barak,” Banga Malewa afirma.
Além ne’e, Indonesian Day 2026 sei aprezenta mós artista husi Indonézia no Timor-Leste, inklui Alcatras husi Timor-Leste no Whisbecker husi Indonézia, hamutuk ho artista lokál sira seluk.
Eventu ne’e loke ba públiku hotu-hotu, la iha taxa entrada no sei disponibiliza produtu, hahán no bebida oioin atu vizitante sira bele sosa no aproveita durante atividade.
Banga Malewa hatutan katak diferensa Indonesian Day tinan ida-ne’e kompara ho tinan anterior mak inklui komponente solidariedade sosial, liuhusi apoiu ba komunidade vulnerável no panti asuhan rua, ne’ebé sei simu doasaun husi organizadór no parseiru apoiadór sira.
Nia dehan katak, kontribuisaun husi patrosinadór sira, iha forma osan no sasán, sei fahe mós ba ema sira ne’ebé presiza apoiu, atu eventu ne’e la’ós de’it fó benefísiu ba públiku jerál, maibé mós ba labarik sira iha uma-kiak.
Nia hato’o esperansa katak, Indonesian Day bele sai plataforma atu hametin relasaun people-to-people entre komunidade Indonézia no Timor-Leste, hodi kontinua harii amizade, ajuda malu, suporta malu no dezenvolve nasaun rua ba oin hamutuk.
“Esperansa ami nian mak relasaun entre povu ho povu sei sai forte liután, atu ita bele suporta malu, ajuda malu, harii malu no avansa hamutuk,” nia afirma.
Nune’e, nia husu apoiu no orasaun husi komunidade hotu atu Indonesian Day 2026 bele lao ho susesu no sai kontribuisaun konkretu ba hametin amizade entre Indonézia no Timor-Leste.
Emprezária Indonézia Espera Indonesian Day Hametin Relasaun
Iha bibaEmprezária Indonézia ne’ebé hela no hala’o atividade negósiu iha Timor-Leste, Christian Bondan, espera katak eventu Indonesian Day 2026 bele hametin liután relasaun amizade entre Indonézia no Timor-Leste, liuliu entre komunidade husi nasaun rua.
Christian Bondan husi Bless Event Organizer, hateten katak eventu ne’ebé Embaixada Indonézia organiza ne’e importante atu hametin relasaun entre povu ho povu no kria oportunidade foun iha área negósiu entre nasaun rua.
Nia esplika katak, liuhusi Indonesian Day, emprezáriu Indonézia bele hetan oportunidade atu dezenvolve relasaun komersiál ho Timor-Leste no emprezáriu Timor-Leste mós bele buka oportunidade negósiu iha Indonézia.
Nia hato’o esperansa katak relasaun entre komunidade no emprezáriu husi nasaun rua sei sai besik liután, hodi kria kooperasaun no oportunidade foun ba dezenvolvimentu ekonomia hamutuk.
(jos)
