BAUCAU, STLTIMORLESTE.com – Projetu reabilitasaun estrada husi Ailemilari to’o Samaguia, Suku Tequinomata, Postu Administrativu Laga, Munisípiu Baucau, ne’ebé tuir kontratu remata iha tinan 2024, to’o agora seidauk finaliza.
Xefe Suku Tequinomata, Abílio Diamantino Ximenes, esplika katak projetu ne’e kompaña lokál Nautetu Fatima Unip. Lda mak implementa, ho distánsia estrada liu kilometru rua.
Tuir nia, kontratu projetu ne’e hahú iha 28 Agostu 2023 no tenke remata iha 28 Agostu 2024. Maibé, to’o loron 13 Novembru 2026, servisu ne’e seidauk remata, no durante semana rua ikus ne’e kompaña la ativa fali servisu iha fatin.
“Ita haree ba nia durasaun ne’e la’o kleur ona, tanba tuir nia kontratu hotu iha 2024, maibé liu ona tinan ida. Nia stok sasán iha armajen laran sei iha, maibé ema mak to’o semana rua ona ba seidauk mai ativa fila fali,” hateten Abílio Diamantino Ximenes ba jornalista sira iha Samaguia, Sesta (13/11/2026).
Nia subliña katak, servisu ne’ebé kompaña konsege implementa ona inklui konstrusaun mini-ponte, valeta, cor beton iha parte balu no cor pasadera iha mota laran. Maibé, parte pasadera ida foin cor sorin, enkuantu sorin seluk seidauk cor.
Aleinde ne’e, servisu ateru iha parte estrada ne’ebé tetuk sira seidauk hahú. Situasaun ne’e halo Autoridade Suku preokupa, tanba kompaña ne’e iha projetu rua iha fatin diferente, no agora nia ekipa foka liu ba projetu seluk, enkuantu projetu estrada Ailemilari–Samaguia servisu para durante semana rua.
“Husi Suku ami hakarak rekomenda ba Obras Públikas, se bele fó atensaun nafatin ba kompaña ne’ebé servisu iha estrada ne’e, tanba haree ba nia durasaun liu ona,” nia dehan.
Relasiona ho preokupasaun ne’e, STL tenta konfirma Koordenadór Tékniku Ministériu Obras Públikas ne’ebé destaka iha Munisípiu Baucau, maibé la konsege hetan komentáriu tanba responsavel refere sei hala’o hela servisu iha Dili. Aliende mós STL seidauk hetan komentáriu husi responsavel kompaña tanba iha Dili.
Projetu reabilitasaun estrada rural Ailemilari–Samaguia, Suku Tequinomata, Postu Administrativu Laga, Munisípiu Baucau, iha valor kontratu hamutuk rihun US$ 436.794,48.
(tom)
