DÍLI, STLTIMORLESTE.com – Prezidente Federasaun Futebol Timor-Leste (FFTL), Nilton Gusmão afirma katak, FFTL fó apoiu tomak ba kandidatura Prezidente FIFA, Gianni Infantino, atu kontinua lidera entidade inan futebol mundiál ba mandatu foun tanba nia vizaun, misaun no programa dezenvolvimentu futebol.
Nilton Gusmão hato’o deklarasaun ne’e ba jornalista sira iha sala konferénsia FFTL, Díli, Sesta-feira (13/11/2026).
Nia esplika katak. desizaun atu apoia kandidatura Infantino bazeia ba koñesimentu no komunikasaun direta ne’ebé FFTL iha ona ho lideransa FIFA.
Nia dehan, FFTL hamutuk ho membru ezekutivu no ekipa federasaun halo desizaun atu fó apoiu tomak ba kandidatura Infantino tanba komprende diak nia programa, liuliu inisiativa FIFA atu fahe reseita ba federasaun membru sira husi atividade futebol mundiál, inklui torneiu FIFA World Cup ne’ebé hala’o kada tinan haat.
Nilton konsidera programa ne’e importante tebes ba federasaun membru, liuliu nasaun ki’ik hanesan Timor-Leste no nasaun sira iha rejiaun Ázia, ne’ebé presiza apoiu husi organizasaun inan futebol mundiál atu dezenvolve modalidade ne’e.
Nia mós hateten katak, infraestrutura futebol ne’ebé Timor-Leste iha agora mai husi apoiu FIFA, liuhusi programa FIFA Forward. Durante mandatu sira liubá to’o agora, FFTL simu ona apoiu no iha komunikasaun di’ak ho FIFA.
Tuir Nilton, nia fiar katak se Gianni Infantino hetan oportunidade atu kontinua lidera FIFA ba mandatu tinan haat tan, dezenvolvimentu futebol sei hetan oportunidade atu avansa liután, tanba nia vizaun no ambisaun atu aumenta númeru nasaun ne’ebé partisipa iha FIFA World Cup.
Nia hatutan katak vizaun atu loke oportunidade ba nasaun barak atu partisipa iha kompetisaun mundiál importante tebes, tanba futebol tenke sai modalidade ne’ebé fó oportunidade ba nasaun hotu, la’ós de’it nasaun dezenvolvidu sira.
Tanba ne’e, Nilton Gusmão reafirma katak, apoiu FFTL ba kandidatura Gianni Infantino bazeia ba programa, rezultadu apoiu ne’ebé Timor-Leste simu ona no vizaun atu dezenvolve futebol iha futuru.
(leo)
