FILIPINA, STLTIMORLESTE.com – Estadu membru ASEAN inklui Timor-Leste, ofisialmente asina Akordu Kuadru Ekonomia Dijitál ASEAN (DEFA), iha Manila, Filipina, Sábadu (14/11/2026).
Observasaun STL nia iha terenu katak, Timor-Leste hamutuk ho nasaun membru ASEAN asina Akordu Kuadru Ekonomia Dijitál atu hametin integrasaun ekonómika rejionál.
Timor-Leste reprezenta husi Vise-Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Dato’ Seri Francisco Kalbuadi Lay.
Nia partisipa no asina akordu ne’e nu’udar reprezentante ofisiál Governu Timor-Leste, hamutuk ho reprezentante nasaun membru ASEAN seluk.
Serimónia asinatura ne’e hala’o nu’udar parte husi enkuadramentu Cimeira ASEAN Dala-49 no Cimeira Relasionada sira.
Akordu DEFA iha objetivu atu hametin integrasaun ekonómika rejionál, liuliu iha komérsiu dijitál, pagamentu eletróniku no dezenvolvimentu teknolojia.
Akordu ne’e mós abranje protesaun dadus, seguransa síber, identidade dijitál, jestaun dadus no intelijénsia artifisiál.
Liu husi akordu ne’e, nasaun membru ASEAN buka harmoniza regra no padraun dijitál atu kria ambiente ekonómiku seguru, inkluzivu no kompetitivu.
DEFA mós objetivu atu fasilita mikro, ki’ik no média empreza (UMKM) asesu ba merkadu rejionál no oportunidade negósiu foun.
Nune’e, akordu ne’e sai instrumentu importante atu promove transformasaun dijitál no hametin kooperasaun ekonómika entre nasaun membru ASEAN.
(jen)
