FILIPINA, STLTIMORLESTE.com – Prezidente Ferdinand Marcos Jr. afirma, Filipinas hametin paz, prosperidade no empoderamentu povu hanesan prioridade prezidénsia ASEAN 2026.
“Konfiansa, koordenasaun, negosiasaun no kolaborasaun entre Estadu-membru ASEAN no parseiru sira sai importante ba futuru rejiaun,”hatete Prezidente Filipina, Ferdinand Bongbong Marcos Jr liu husi pelanria iha fatin Sentru Konvensaun Internasionál Filipina (PICC), Domingu (15/11/2026).
Nia hateten katak, inisiativa hirak-ne’e reflete esforsu kolektivu durante tinan barak, hodi kontinua avansa agenda ASEAN 2045 nu’udar vizaun futuru komún.
Marcos Jr. hateten katak, Filipinas nia prezidénsia ASEAN 2026 bazeia ba prioridade prinsipál tolu, mak Paz no Seguransa hanesan Âncora, Korredór Prosperidade no Povu no Empoderamentu.
Nia esplika katak, prioridade hirak-ne’e la’ós de’it vizaun ba tinan 30 oin mai, maibé sai orientasaun ba desizaun polítika no asaun husi agora.
Iha prioridade dahuluk, Filipinas foka ba hametin paz, estabilidade no seguransa rejionál liuhosi diálogu, norma internasionál no kooperasaun marítima.
Esforsu hirak-ne’e inklui negosiasaun kona-ba Kódigu Konduta iha Tasi Súl Xina, tuir lei internasionál, inklui Konvensaun Nasoins Unidas kona-ba Lei Tasi nian (UNCLOS) 1982.
Aleinde ne’e, Filipinas mós foka ba preparasaun hasoru dezastre naturál, risku klimátiku no ameasa transnasionál ne’ebé bele afeta seguransa rejionál.
Iha prioridade Korredór Prosperidade, Filipinas buka hametin konektividade entre merkadu, sistema enerjia, infraestrutura, teknolojia no finansas.
Objetivu mak promove kresimentu ekonomia ne’ebé reziliente, estável no inkluzivu, hodi responde ba mudansa komérsiu no teknolojia globál.
Marcos Jr. informa katak, prezidénsia Filipinas sei kumpre inisiativa ekonomia prioritária hamutuk 19 to’o rohan tinan 2026.
Inisiativa hirak-ne’e inklui asinatura Akordu Kuadru ASEAN kona-ba Ekonómia Dijitál, nu’udar pasu importante ba integrasaun ekonomia rejionál.
Enkuantu prioridade povu no Empoderamentu, Filipinas buka harii ASEAN ne’ebé inkluzivu no reziliente, hodi proteje grupu vulnerável no hametin família no komunidade.
Prioridade ne’e mós inklui preparasaun juventude ba futuru, garante dignidade ba katuas-ferik no aumenta partisipasaun públika iha jestaun dezastre.
Marcos Jr. subliña katak, prioridade tolu ne’e tenke hala’o hamutuk, tanba dame, prosperidade no bem-estar povu nian iha ligasaun direta.
“Paz, prosperidade no bem-estar povu sira-nian sai interligadu liután. Tanba ne’e, instituisaun ita-nian tenke sai di’ak liután iha servisu hamutuk,”nia informa.
Prezidente Filipina mós enfatiza importánsia kooperasaun entre governu, setór negósiu, sosiedade sivíl, akademia no povu hodi atinji objetivu komún ASEAN.
Iha kooperasaun internasionál, Filipinas simu parte kontratante foun na’in hitu ba Tratadu Amizade no Kooperasaun iha Sudeste Aziátiku (TAC).
Nasaun foun hirak-ne’e inklui Turquia, Dinamarka, Alemaña no Katar, ne’ebé sei hametin rede parseiru ASEAN nian.
Marcos Jr. husu ba parseiru sira atu transforma vontade polítika ba kooperasaun konkretu, bazeia ba benefísiu mútuu no respeitu ba sentralidade ASEAN.
Nia mós reafirma importánsia dezenvolve ASEAN Outlook on the Indo-Pacific nu’udar baze ba kooperasaun ne’ebé nakloke, inkluzivu no prátiku.
Iha enkontru ne’e, Filipinas simu konvidadu espesiál husi Primeiru-Ministru Kanada, Mark Carney, no Prezidente Brazil, Luiz Inácio Lula da Silva.
Diretora-Jerál Fundu Monetáriu Internasionál (IMF), Kristalina Georgieva, mós marka prezensa iha enkontru ne’e, iha momentu ekonomia globál hasoru dezafiu ba kresimentu no estabilidade finanseira.
Iha remata nia diskursu, Marcos Jr. hato’o konvite ba líder Estadu-membru ASEAN sira atu reflete kona-ba kapasidade organizasaun ne’e atu atinji objetivu ba futuru.
Nia depois deklara abertura ofisiál Sesaun Plenária Summit ASEAN dala-49, antes husu ba média atu fó oportunidade ba líder sira atu hahú sesaun taka (closed session).
(jen)
