Diploma Tenke Balansu ho Koñesimentu

Ilustrasaun (Foto: Espesial)

DÍLI, STLTIMORLESTE.com – Pró-Reitór Asuntu Kooperasaun Univerisdade Nasional Timor Lorosae (UNTL), husu dosente sira atu garante graduadu sira hetan diploma ne’ebé korresponde ho koñesimentu no kapasidade akadémika ne’ebé forte.

Apelu ne’e hato’o husi Pró-Reitór Universidade Nasionál Timor Lorosa’e (UNTL) ba Asuntu Kooperasaun, Cristóvão dos Reis, ba STL iha Salaun Delta Nova, Kuarta-feira (18/11/2026).

Nia hateten katak, kualidade edukasaun iha Timor-Leste iha ona, maibé bainhira kompara ho nasaun seluk, liuliu nasaun sira iha ASEAN, Timor-Leste sei iha nivel ne’ebé kraik.

Tuir nia, situasaun ida-ne’e tenke sai hanesan mensajen ba dosente sira, liuliu iha universidade públika no privada, atu kontinua hadi’a kualidade prosesu hanorin no aprendizajen, hodi prepara joven Timor-oan sira ba futuru nasaun.

Nia enfatiza katak, knaar dosente nian la’ós de’it hanorin estudante atu hetan diploma, maibé tenke asegura katak estudante sira iha koñesimentu ne’ebé natoon no kompeténsia atu kontribui ba dezenvolvimentu nasaun.

Nia subliña katak, Timor-Leste presiza graduadu sira ne’ebé iha diploma no koñesimentu ne’ebé balansiu, la’ós diploma aas maibé koñesimentu menus.

“Ita hakarak diploma, maibé diploma ne’ebé balansiu ho koñesimentu ne’ebé hakerek. Ita-nia dosente sira iha universidade públika no privada, hanesan edukadór, tenke muda ita ba di’ak liután no prepara ita-nia an iha siénsia, lian Inglés no lian Portugés.

Tanba ita tama ASEAN, ita tenke hakat atu tuur hanesan nasaun seluk. Ita tenke hatudu ita-nia kapasidade no matenek, atu nasaun seluk bele haree.

Labele dehan de’it katak ita dosente, maibé koñesimentu tenke balansiu ho ita-nia pozisaun hanesan edukadór iha universidade,” dehan Cristóvão dos Reis.

Nia mós husu dosente sira atu kontinua dezenvolve kapasidade sientífika no linguístika, hodi bele prepara graduadu sira ne’ebé kompetente no iha kapasidade atu kompeti ho graduadu husi nasaun seluk.

(joa)

Share it :

Leave a Reply

Your email address will not be published. Required fields are marked *