Prezidénsia Repúblika Prepara Natal do Povo 2026

Foto: STL/Emerenciana Pinto

DÍLI, STLTIMORLESTE.com – Prezidénsia Repúblika (PR) hahú preparasaun ba programa Natal do Povo 2026, ne’ebé sei hala’o husi 28 Novembru to’o 22 Dezembru.

Chefe Casa Civil, Henriqueta Maria da Silva, lidera enkontru koordenasaun téknika ho reprezentante ministériu no instituisaun relevante sira, iha Salaun Xina, Palásiu Prezidensiál, Kuarta-feira (18/11).

Enkontru ne’e organiza husi Unidade Servisu Sosiedade Sivíl no Asuntu Sosiál (SSSAS), atu koordena preparasaun téknika no operasionál ba eventu anual ne’e.

Tuir vizaun Prezidente Repúblika, José Ramos-Horta, selebrasaun Natal tinan ida-idak tenke tau komunidade iha sentru, liuhusi oportunidade ekonómika no atividade sosiál inkluziva.

Durante fulan ida, área Palásiu Prezidensiál sei transforma sai espasu atividade ekonómika, ne’ebé fó oportunidade ba agrikultór lokál no vendedór ambulante atu fa’an produtu fresku, hahán tradisionál no artezanatu.

Programa ne’e sei inklui abertura presépiu tradisionál, 145 stand ba vendedór no ezibisaun, atividade ba labarik, jogu tradisionál no konsertu pianu iha loron 20 Dezembru.

Iha área solidariedade sosiál, Prezidénsia sei koordena distribuisaun pakote apoiu umanitáriu ba família vulnerável sira iha munisípiu hotu.

Prezidénsia mós sei hala’o vizita karitativa ba pasiente iha ospitál no prizioneiru sira iha instituisaun prisionál Bekora, Gleno no Suai.

Chefe Casa Civil apresia kompromisu hamutuk entre instituisaun Estadu, inklui Primeiru-Ministru, Vise-Primeiru-Ministru, PAM Dili, ministériu relevante sira no Polísia Nasionál Timor-Leste (PNTL).

Koordenasaun interinstitusionál ne’e foka ba preparasaun lojístika, saneamentu públiku, jestaun tráfiku no servisu emerjénsia médika, atu garante seguransa no konfortu ba partisipante sira.
M

Chefe Casa Civil, Henriqueta Maria da Silva, subliña importánsia kompromisu no servisu hamutuk entre instituisaun Estadu sira atu garante susesu programa Natal do Povo 2026.

Programa ne’e espera atu sai eventu inkluzivu, seguru no signifikativu, ne’ebé promove solidariedade, kultura no atividade ekonómika ba família timoroan sira.

(eme)

Share it :

Leave a Reply

Your email address will not be published. Required fields are marked *