DÍLI, STLTIMORLESTE.com – Regiaun de Maria tenke sai ezemplu di’ak ba ema hotu liuhusi servisu apostoladu hitu no sasin moris kristaun iha família no sosiedade.
Lia hirak-ne’e hato’o husi Padre Benediktus Nuwa, CMF, nu’udar oradór iha Segundu Kongresu Rejiaun de Maria, ho tema “Servisu Apostoladu Hitu iha Paróquia”, iha Salaun São José, Katedrál Dili, Sesta (20/11/2026).
Pe. esplika katak, servisu apostoladu Regiaun de Maria iha parókia importante tebes, tanba membru sira iha responsabilidade atu hakbesik an ba sarani sira, ajuda komunidade no hametin relasaun entre sarani sira ho Igreja no Maromak.
Nia hateten katak, servisu apostoladu hitu ne’e nu’udar dalan ida atu membru Rejiaun de Maria bele kontribui ba vida pastorál iha paróquia no hatudu prezensa Igreja iha komunidade.
Atividade apostoladu hitu ne’e inklui vizita família atu fó animu no hametin fiar, vizita ema moras atu fó konsolasaun, prepara sarani sira ba katekeze, akompaña família matebian, halo orasaun hamutuk ho família ne’ebé sofre tanba mate, fó apoiu ba ema ne’ebé hasoru difikuldade no sai ezemplu moris kristaun.
“Ha’u hanoin katak servisu apostoladu iha paróquia mak buat ida furak tebes, tanba atividade sira-ne’e ajuda ita atu vizita família, vizita ema moras, prepara sarani sira ba katekeze no hakbesik an ba ema ne’ebé hasoru susar, inklui família matebian,” nia afirma.
Nia enfatiza katak, membru Rejiaun de Maria tenke sai ezemplu di’ak ba família no sosiedade, liuliu hahú husi família rasik, tanba hahalok no liafuan sira tenke reflete valor moris kristaun.
Tuir Pe. sarani sira tenke fó sasin moris di’ak nu’udar kristaun liuhusi hahalok, liafuan no komprensaun ne’ebé loos, tanba ema seluk bele haree no avalia fiar kristaun liuhusi ita-nia moris loroloron.
Nia mós lembra katak, sasin moris kristaun importante tebes atu hatudu domin, solidariedade no responsabilidade ba ema seluk iha família no sosiedade.
(joa)






