DILI, STLTIMORLESTE.com – Prezidente Repúblika (PR), José Ramos-Horta sei konvida Prezidente Filipina Ferdinand Romualdez Marcos Jr. atu vizita Timor-Leste, maibé data vizita seidauk konfirma.
Primeiru-Ministru Kay Rala Xanana Gusmão hato’o informasaun ne’e ba jornalista sira, hafoin enkontru semanal ho Prezidente Repúblika iha Palásiu Prezidensiál Nicolau Lobato, Bairro Pité, Dili, Sesta-feira (20/11/2026).
Xanana esplika katak, konvite ba Prezidente Filipina sei liuhusi komunikasaun diplomátika, maibé to’o agora seidauk iha data klaru kona-ba realizasaun vizita.
“Prezidente sei konvida Prezidente Filipina atu mai, maibé sei kontaktu ho Embaixada. Seidauk hatene bainhira mak sei mai,” Xanana dehan.
Durante enkontru ne’e, Prezidente Ramos-Horta mós aprezenta ba Primeiru-Ministru kona-ba nia viajen ba Europa no nasaun seluk.
Xanana informa katak, Prinsipe husi Mónako sei vizita Timor-Leste iha loron 24, maski nia seidauk fó informasaun kle’an kona-ba objetivu vizita ne’e.
“Ha’u dehan ba Prezidente katak iha loron 24 ha’u sei ba loke espesialidade iha Parlamentu. Ita haree uluk saida mak sei akontese,” Xanana afirma.
Iha parte seluk, Xanana refere ba diskusaun iha Parlamentu Nasionál, ne’ebé envolve debate no proposta oioin husi deputadu sira kona-ba mudansa iha área diferente.
Nia hatete katak, Governu simu proposta barak, no sei kontinua diskusaun ho Prezidente Parlamentu no entidade relevante sira, inklui matéria ne’ebé envolve Ministériu Finansas.
“Ha’u sei ko’alia ho Prezidente Parlamentu kona-ba proposta sira ne’e, inklui matéria husi Finansas,” nia dehan.
Xanana mós temi naran Simão Barreto, ne’ebé hela iha Macau no iha abilidade iha área múzika. Nia hatete katak Prezidente bolu Simão Barreto atu hasoru malu no fó apresiasaun ba nia.
Enkontru semanal entre Primeiru-Ministru Kay Rala Xanana Gusmão no Prezidente José Ramos-Horta iha Palásiu Prezidensiál sai mekanizmu atu troka informasaun no diskute asuntu importante sira kona-ba dezenvolvimentu nasaun no relasaun internasionál.
Konvite ba Prezidente Filipina atu vizita Timor-Leste bele sai parte husi esforsu diplomátiku atu hametin relasaun bilateral entre Timor-Leste no Filipina.
Timor-Leste no Filipina iha relasaun diplomátika ne’ebé importante ba kooperasaun bilateral, inklui área ekonomia, edukasaun, komérsiu no relasaun entre povu rua.
Aleinde asuntu diplomátiku, enkontru ne’e mós ko’alia kona-ba agenda institusionál Governu, proposta sira iha Parlamentu Nasionál no preparasaun ba atividade nasionál.
Iha parte ikus, Xanana refere ba komemorasaun Proklamasaun Independénsia Unilateral Timor-Leste, ne’ebé selebra kada loron 28 Novembru. Nia hatete katak reprezentante husi nasaun oioin sei partisipa iha komemorasaun ne’e.
(eme)






