DÍLI, STLTIMORLESTE.com – Embaixada Repúblika Indonézia (KBRI) iha Díli sei hala’o Indonesian Day Dili 2026 iha loron Sábadu (21/11/2026), atu hametin amizade no promove kooperasaun kulturál no ekonómika entre nasaun rua.
Enkarregadu Negósiu Ad Interim (KUAI) Embaixada Repúblika Indonézia (KBRI) iha Timor-Leste, Raden Sakunto Paksi hatete katak, atividade ne’e nu’udar programa promosaun integradu ne’ebé KBRI organiza hamutuk ho Ministériu Kultura Indonézia no hetan apoiu husi parseiru patrosinadór sira.
“Objetivu atividade ne’e atu hametin amizade entre Indonézia no Timor-Leste liuhosi diplomásia kulturál, promosaun ekonómika no partisipasaun komunidade,” deklara Raden Sakunto Paksi liu husi konferénsia imprensa, ne’ebé hala’o iha KBRI, Palapasu, Díli, Sesta (20/11/2026).
Nia esplika katak, atividade ne’e mós sai plataforma atu promove riku-soin arte, kultura, kreatividade no produtu unggul Indonézia nian ba komunidade Timor-Leste.
Programa hahú ho Nusantara Cultural Cinema, ne’ebé hala’o durante loron tolu, husi 18 to’o 20 Novembru 2026, iha Sentru Kultura Indonézia (PBI), Díli.
Liuhosi atividade ne’e, KBRI Díli ativa Uma Kultura Indonézia nu’udar plataforma interkámbiu kulturál no introdús istória, identidade no espresaun kulturál Nusantara nian.
Puntu másimu Indonesian Day Dili 2026 sei hala’o iha Sábadu (21/11/2026), iha Timor Plaza, Díli, no loke gratuitamente ba públiku tomak.
Organizadór sira sei aprezenta espetákulu múzika, arte no kultura, bazár kulinária, ezekibisaun produtu, entretenimentu no prémio surpresu ba partisipante sira.
Artista Wiizz Baker no Banda Alcatraz sei halo aprezentasaun espesiál, ho objetivu dada atensaun públiku, liuliu iha grupu jerasaun foun.
Iha área ekonómika, Indonesian Day Dili 2026 sei fó oportunidade ba emprezáriu no kompania Indonézia sira atu promove produtu no servisu ba merkadu Timor-Leste.
Produtu ne’ebé sei promove inklui hahán, kulinária, têxtil no artesanatu, hanesan batik, ne’ebé reprezenta patrimóniu kulturál no indústria kreativa Indonézia nian.
Partisipasaun kompania husi setór oioin, inklui servisu no profisionál, sei hatudu mós potensialidade Indonézia iha área ekonómika.
Promosaun ne’e mós inklui dezenvolvimentu rekursu umanu, inklui programa formasaun kontabilidade ne’ebé kompania Indonézia sira hala’o ona iha tempu uluk.
Nune’e, inisiativa ne’e la limita de’it ba komérsiu sasán, maibé mós promove kompeténsia, servisu profisionál no kolaborasaun entre setór sira.
Organizadór sira espera Indonesian Day bele kria interasaun direta entre fornecedór produtu no servisu Indonézia nian ho konsumidór no parseiru negósiu potensial iha Timor-Leste.
Atividade ne’e mós iha objetivu atu habelar asesu merkadu, hasa’e koñesimentu kona-ba produtu Indonézia, harii rede negósiu no loke oportunidade koperasaun ekonómika ne’ebé fó benefísiu ba nasaun rua.
Liuhosi integrasaun promosaun kulturál no ekonómika, Nusantara Cultural Cinema no Indonesian Day Dili 2026 espera bele hametin relasaun entre komunidade Indonézia no Timor-Leste.
Inisiativa ne’e mós espera bele hametin imajen pozitivu Indonézia, habelar prezensa produtu no servisu Indonézia nian, no haforsa relasaun bilaterál sustentável entre nasaun rua.
Fatin hanesan Vokalista banda Muzika Alcatraz, Nelcen Escurial, hato’o agradeseimentu ba Embaixada Repúblika Indonézia (KBRI) iha Díli, ne’ebé konvida Alcatraz atu partisipa iha Indonesian Day Dili 2026.
“Alcatraz hakarak hato’o obrigadu barak ba KBRI, ne’ebé fó ona konvite ba ami atu partisipa iha eventu espesiál ida-ne’e,” hatete Nelcen Escurial.
Nia esplika katak, iha eventu ne’e, Alcatraz sei aprezenta músika hamutuk lima atu anima públiku ne’ebé partisipa iha selebrasaun ne’e, iha kapitál Díli.
Nune’e mos artista husi Indonézia, Wizz Baker hato’o agradeseimentu ba KBRI Díli, ne’ebé konvida nia atu partisipa no anima públiku iha Indonesian Day 2026.
“Ida-ne’e hanesan dala daruak hau vizita Timor-Leste. Primeiru hau vizita Oekusi, no agora iha Díli. Hau hein katak eventu aban kalan sei lao ho susesu,” dehan Wizz Baker.
Nia informa katak, iha eventu ne’e, nia sei lori músika hamutuk 10, inklui muzika sira kona-ba domin no músika ne’ebé públiku Timor oan gosta, hanesan músika dansa bidu no haksoit.
Wizz Baker espera katak, liuhusi selebrasaun Indonesian Day 2026, amizade no relasaun entre komunidade Indonézia no Timor-Leste bele hametin liután.
Entretantu, iha eventu ne’e, KBRI Díli mós sei organiza sorteiu ho prémio interesante, inklui motór Yamaha Beat Street rua no bilhete viajen ba rota Díli–Bali ba ema ida.
(alb)






