Ramos-Horta Defende Prezervasaun Múzika Timorense

DÍLI, STLTIMORLESTE.com – Prezidente Repúblika (PR), José Ramos-Horta apela ba prezervasaun patrimóniu muzikál Timor-Leste no enkoraja inovasaun entre artista joven sira.

Prezidente Repúblika, José Ramos-Horta hato’o lia hirak ne’e liu husi nia diskursu iha Palásiu, Sesta (20/11/2026), konsidera múzika nu’udar instrumentu importante ba edukasaun, dame, rekonsiliasaun no harii identidade nasionál.

Iha VI Série Konferénsia Prezidensiál 2026, nia aprezenta tema “Múzika Timorense entre Tradisaun no Kriasaun”, iha Palásiu Prezidensiál Nicolau Lobato.

Ramos-Horta afirma katak, Timor-Leste iha patrimóniu muzikál riku, ne’ebé mai hosi tradisaun, lian, instrumentu, ritmu no melodia komunidade sira.

“Prezerva tradisaun la signifika prevene evolusaun. Kultura ida moris nafatin bainhira nia konsege halo diálogu ho nia tempu,” deklara Prezidente.

Nia defende katak, edukasaun artístika presiza hetan investimentu, hodi fó oportunidade ba labarik no joven sira atu aprende múzika no dezenvolve talentu.

Prezidente mós enkoraja artista timoroan sira atu kria obra foun, utiliza instrumentu tradisionál no promove identidade kulturál nasionál iha nivel internasionál.

Nia kompara orkestra ho sosiedade, ne’ebé instrumentu no múziku ida-idak iha papél importante atu kria armonia liuhosi respeitu no kolaborasaun.

Diskursu ne’e inklui mós rekoñesimentu ba Maestro Simão Barreto, ne’ebé simu Orden Timor-Leste tanba nia kontribuisaun ba edukasaun no kultura muzikál.

(eme)

Share it :

Leave a Reply

Your email address will not be published. Required fields are marked *