DILI, STLTIMORLESTE.com – Asosiasaun Arbitrajem Futebol Timor Leste (AAF-TL) nuudar membru ba Federasaun Futebol Timor Leste (FFTL) akuza Komisaun Organizadira Tasa Avo Nana, tanba realiza taxa nee la kolabora no la uza arbitrajem sira husi Timor, maibe uza arbitrajem husi nasaun vizinhu Nusa tenggara Timor (NTT), Indonezia.
Prezidente AAF-TL, Nivio Da Costa Fernandes hateten, komisaun organizadora tasa Avo Nana tinan 2025 nunka konsidera katak, AAF-TL mak nuudar organizasaun ida neebe iha kompetensia tomak hodi organiza, kapasita no valida arbitru hodi lidera kompetisaun ofisial sira neebe realiza iha Timor Leste.
“AAF-TL nuudar membru ba FFTL neebe goza tuir nia estatutu no rejimentu interna rasik, AAF-TL nuudar organizasaun ida neebe sai mahan ba ekipa arbitrajem hotu iha teritoriu Timor laran tomak, involvimentu ekipa arbitrajem iha kompetisaun ofisial sira iha teritoriu rai laran, hahu husi nivel suku, Postu Administrativu, Munisipiu, Nasional inklui Liga Nasional sira neebe realiza kabe ba kompetensia AAF-TL”, hatete Nivio iha salaun Xanana Sport Centre, Dili, Kinta (10/04/25).
Nia dehan, AAF-TL hakotu akordu servisu hamutuk ho Komisaun Organizadora ba kompetisaun tasa rotativa Avo Nana 2025 ho pontu sira hanesan tuir mai nee.
Tanba ho situasaun nee akontese husi kedas tinan 2024 no atitude neebe iha lori Prezidente Komisaun Organizadora ho inisiativa halo aprosimasaun individu ba kada arbitru sira hodi bele asegura abertura Tasa Avo Nana iha tinan 2024 no 2025 neebe tuir lo-loos Komisaun Organizadora tenke iha akordu servisu hamutuk ho AAFTL nunee bele difini direitu no dever husi parte rua.
Lideransa nee reafirma, AAFTL la iha konhesimentu kona-ba enkontru tekniku sira neebe tuir lo-loos nuudar momentu importante ida ba AAF-TL, hodi halo aprezentasaun ba mudansa regulamentu jogu sira, infelizmente situasaun ne’e la akontese, Tasa Avo Xanana la akordu servisu hamutuk foin bele asina, hafoin abertura tasa Nana iha Gleno, Ermera, nee hatudu komisaun organizadora la tau importansia involvimentu ekipa arbitrajem iha kompetisaun Tasa Avo Nana 2025.
“Prezidente Komisaun Organizadora diretamente akuza arbitru sira iha loron 29 Marsu 2025, iha tempu neebe FC Relay kontra FC Laivai ho lia fuan “arbitru sira halao knaar la justu no la profisional, sira oin osan no ezije liu osan”, akuzasaun nee dala ida tan repete nia estetmentu sira neebe tinan kotuk prega ba arbitru sira katak “wasit matan osan” no la fiar tan ona wasit Timoroan, ho nunee mak AAFTL deside hakotu akordu servisu hamutuk ho Komisaun Organizadora no sei la responsabiliza ba asaun hotu-hotu neebe iha ligasaun ho asuntu arbitrajem iha Tasa Avo Nana 2025,” nia haktuir.
Nia konta tuir katak, hafoin akordu nee asina, ekipa arbitrajem halao nia knaar ho responsabilidade no kontinua husu parte Komisaun Organizadora atu asegura kompetisaun liu husi pedidu apoiu PNTL nunee kompetisaun nee bele susesu, maibe infelizmente proposta nee ladun tau atensaun husi Komisaun Organizadora, nunee AAFTL konsidera katak Prezidente Komisaun Organizadora iha konflitu interese iha kompetisaun sira neebe iha ligasaun ho Klubu FC Laleia neebe iha ligasaun emosional direta ho Prezidente Komisaun Organizadora.
Tanba nee, AAF-TL konsidera katak laiha separasaun poder husi Prezidente Komisaun Organizadora Tasa Avo Nana, tanba nuudar Prezidente Komisaun Organizadora bele halo funsaun hanesan dirijente ba Klubu FC Laleia no ate bele hola papel nuudar Asistante Arbitrajem iha loron 6 Abril 2025.
Nunee Prezidente Komisaun Organizadora diretamente akuza arbitru sira iha loron 29 Marsu 2025 iha tempu neebe FC Relay kontra FC Laivai ho lia fuan “arbitru sira halao knaar la justu no la profisional, sira oin osan no ezije liu osan” akuzasaun nee dala ida tan repete nia estetmentu sira neebe tinan kotuk prega ba arbitru sira katak “wasit matan osan” no la fiar tan ona wasit Timoroan, ho nunee mak AAFTL deside hakotu akordu servisu hamutuk ho Komisaun Organizadora no sei la responsabiliza ba asaun hotu-hotu neebe ha ligasaun ho asuntu arbitrajem iha Tasa Avo Nana 2025.
(EST 2)
