DILI, STLTIMORLESTE.com – Jogu klasiku faze eliminasaun Kopa Mundial iha aban madrugada sei sai nuudar konfrontasaun boot hodi hatudu se mak sei lakon, Cristiano Ronaldo ho ninia esperiensia boot ka foinsae Lamine Yamal ho nia talentu foun. Konfrontasaun neebe hein namanas husi mundu tomak nee sei halao iha Estadiu Dallas, Texas, Estadus Unidus, iha loron Tersa, 7 Julhu 2026, tuku 04:00 madrugada oras Timor Leste, nuudar dezafiu boot ba rival rua Europa nian hodi buka bilhete ba faze kuartu final.
Espana tama ba dezafiu nee ho rezultadu neebe solidu ho brilhante tebes durante kampionatu nee lao.Ekipa Espana nian nee hatudu defeza metin tebes hodi mantein rekorru pozitivu ka kapas, no liuliu tanba ekipa la simu golu ida hosi adversariu sira (0 golu) iha faze sira liu ba. Iha faze 32, foinsae Espana nian hatudu sira nia potensia hodi manann ho eskoru boot 3-0 hasoru Austria, nuudar sinal avizu nian ba Portugal.
Iha parte seluk Portugal nuudar ekipa neebe tenke luta ho vontade no esforsu tomak hodi hakat mai too faze nee. Selesaun das Quinas konsege hakat mai faze eliminasaun hafoin manan hosi Korasia ho eskoru apertadu 2-1 liuhusi golu Cristiano Ronaldo no Goncalo Ramos. Maske hasoru presaun boot, esperensia hosi jogador veteranu sira sei sai nuudar xave hodi dudu ekipa ba oin.
Jogu rival boot rua nee sei sai mos nuudar teste boot ba estratejia hosi treinador rua. Defeza Espana nian neebe dinamiku maibe metin sei simu teste boot husi lina atake Portugal nian neebe sempre buka hatama golu iha minutu hotu. Adeptu futebol sira iha mundu tomak, liuliu iha Timor-Leste hein namanas partida neebe sei lao ho intensidade aas no drama boot iha kampu laran.
Entuazmu boot mos senti hosi adeptu Portugal iha Timor-Leste, Rafael de Araújo neebe hatete katak,jogu nee sei lao makas no pasiu futebol nian boot tebes, maibe nia fiar katak kualidade Cristiano Ronaldo no nia kolega sira hodi hatama golu ba Espana nian.
Tuir nia maski Espana hatudu defeza neebe metin tebes iha kampionatu nee, esperensia no moris boot hosi ekipa Portugal nian sei sai save hodi asegura vitoria no lori bilhete ba faze kuartu final Kopa Mundial.
“Hau hanoin jogu iha aban madrugada nee sei lori emosaun boot mai ami adeptu sira, tanba nee laos deit konaba futebol, maibe konaba istoria no domina ba ekipa nasional Portugal,” dehan Rafael ba STL, Segunda nee (06/07/2026).
Nia dehan, maske hakat ba oin sei sai klean no susar, nia nafatin optimiznu boot katak Portugal bele asegura vitoria. Nia fiar metin katak espiritual hamutuk no determinasaun hosi ekipa laran nian sei lori naroman foun hodi nunee bele lori Vitoria ba fali jogu tuir mai.
Iha parte seluk, sentimentu konfiansa nian mos mai hosi Adeptu Espana iha Timor-Leste, Manuel de Oliveira neebe optimista tebes katak ekipa Espana sei hatutan sira nia susesu iha kampu laran. Nia dehan ho kapasidade no tatika neebe foinsae Espana nian hatudu ona, ekipa nee prontu ona hodi fiar an hodi hasoru Portugal no fokus ba oin hodi hakat liutan lori titlu kampionatu nian ba fali rai Espana.
(car)
