DILI, STLTIMORLESTE.com – Aban dader, mundu sei haree se mak sei despedida husi Kopa Mundial 2026, Korasia ka Portugal, bainhira Selesaun Nasional rua neebe nakonu ho istoria hasoru malu iha jogu moris ka mate husi faze eliminasaun (Ronda 32). Jogu nee sei halao iha Estadiu Toronto, Kanada, no transmete dader fali, Sesta (02/07), tuku 08:00 dader OTL.
Jogu nee konsideira nuudar dezafiu neebe boot tebes ba ekipa rua nee, nuudar nasaun rua neebe iha istoria naruk iha futebol Europeu nian.Atensaun mundu nian mos sei foka ba kapitaun nain rua, Cristiano Ronaldo ho Portugal no Luca Modric hosi Korasia, neebe halao sira nia kompetisaun ba dala ikus iha Kopa Mundial.
Portugal susesu hakat ba faze eliminasaun nuudar runner-up husi grupu K ho pontu 5, hela deit iha Kolombia nia kotuk. Ekipa neebe dirije husi treinador Roberto Martinez nee, hahu sira nia viajen ho rezultadu empata 1-1 Republika Demokratika Kongo, tuir fali ho vitoria boot 5-0 kontra Uzbekistan, no taka ho rezultadu mamuk 0-0 kontra Kolombia.
Iha parte seluk, Korasia mos hetan pasajen nuudar runner-up husi grupu L ho pontu 6, tuir iha Inglatera nia kotuk. Ekipa Zlatko Dalic nian nee hatudu sira nia determinasaun boot hodi manan kontra Panamá (1-0) no Gana (2-1), maski iha primeiru jogu lakon hasoru Inglatera ho és kor 4-2.
Entuziasmu ba jogu boot nee mos aas tebes iha Díli laran. Adeptu fanatiku Portugal iha Timor-Leste, Zacarias Sarmento hateten katak, nia fiar metin katak Cristiano Ronaldo ho ninia maluk sira sei hatudu dezempenhu ka kualidade neebe diak liu hodi manan hasoru Korasia.
“Jogu aban dader nee sei lori presaun boot, tanba Korasia ekioa ida neebe forsa no hatene joga iha faze eliminasaun. Maibe, nuudar adeptu Portugal, hau fiar katak Ronaldo sei hatudu fali ninia kapasidade boot hodi lori vitoria. Ami iha nee prontu ona atu dader -saan hodi fo apoiu tomak,”dehan Zacarias ba STL, Kinta nee (02/07/2026).
Nia dehan, maski futebol nakonu ho kualker potensia no susar atu siik, maibe nia parte kontinua laran metin katak titlu mundial ba tinan nee tenke sai hosi nasaun Português nian.
Iha parte seluk Observador Futebol, Daniel de Jesus hatete, jogu nee sei depende ba tatika neebe treinador rua sei uza, tanba ekipa rua nee iha kualidade final neebe hanesan tebes, maibe Korasia iha vantajen oituan hosi mentalidade no esperensia jogu nian kuandu tama marka penalti.
(car)
