BAUCAU, STLTIMORLESTE.com – Reprezentante Abu oan iha foho Matebian hun, Postu Administrativu Matebian, Munisipiu Baucau, husu hikas sira nia natureza ba FALINTIL atu devolve.
Reprezentante Abu oan, João Buka Tuir konta, iha prosesu luta libertasaun Nasional funu hasoru invazaun Indonezia, mezmu Timor oan FALINTIL laiha armas neebe modernu, maibe barani luta hasoru too ukun rasik aan, tanba Timor hetan akompanhamentu husi natureza.
Iha faze Timor ukun aan, hanesan Timor oan goza iha prosesu dezenvolvimentu ho isin lolon, maibe laiha klamar, ema orijen Timor fiar dahuluk mak natureza husi uma lisan no beala sira, maibe ba Abu oan nee triste, tanba natureza neebe sira adora, iha tinan 1976 lori sai husi Segundu Kompanhia FALINTIL, neebe akompanha husi Primeiru Kompanhia no Terseiru Kompanhia hodi akompanha aan iha prosesu luta, maibe too ohin loron seidauk hatur hikas iha nia fatin propriu.
“Ida nee mak hau nia mensajen ba Governu tau matan natureza sira nee tau fali iha nia fatin, neste momentu hau nuudar Abu nia oan too ohin loron seidauk tau fali nia fatin,” hateten João Buka Tuir ba jornalista sira iha Abu, Postu Administrativu Matebian, Munisipiu Baucau, Kinta (20/06/2026).
Nia informa, ho natureza neebe sira adora atual la eziste iha sira nia fatin afeta ba sira infrenta moras, maibe sempre hamulak deit iha ambitu sau batar no hare foun. Maibe hamulak nee hanesan bosok deit ona, tanba natureza orijen neebe antes iha tinan 1976 sira uza atual laiha.
Nunee husu ba Estadu Timor Leste atu rezolve problema refere hodi hatuur hikas natureza iha nia fatin hodi fo matak malirin ba nain sira.
Hatan ba kestaun nee, Xefe Estadu Maior Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raúl “Falur Rate Laek” hateten, problema refere laos FALINTIL atual nian.
“Ida nee problema laos hau nian, problema nee Konselhu Veteranus sira ho Ministeriu Asuntu Venteranus, Ministru tenke rona estrutura Komando la basta nia iha neeba halo politika, maibe enkarna ba ita nia realidade,” hateten Falur.
Enkuantu Prezidente Konselhu Munisipal Kombatentes Libertasaun Nasional Baucau, Cornelio Gama “L7” hateten, koalia kona-ba natureza refere sei relata ba Governu foti dezisaun hamutuk.
“Uluk funu fahe ba kada rejiaun, entaun kada rejiaun espllika para ema hatene, por ezemplu hau labele ba esplika Lospalos nian,” katak L7.
(tom)
