BAUCAU, STLTIMORLESTE.com – Autoridade Suku Atelari husu kompanhia Adedebideal Unip. Lda. atu aselera projetu reabilitasaun estrada iha Suku Atelari, Postu Administrativu Laga, Munisípiu Baucau, tanba tempu udan besik ona no progresu servisu iha terenu seidauk to’o 50%.
Xefe Suku Atelari, Paul Ximenes, hateten katak Suku Atelari iha aldeia 10, maibé aldeia Liarafa, Nelu’uai, Atelari no Sirimana durante tinan barak enfrenta kondisaun estrada ne’ebé aat.
Nia hateten katak, durante tempu udan, mota Daramata no Maurate sai obstákulu ba movimentu komunidade, inklui estudante sira ne’ebé presiza liu hosi área ne’e atu ba eskola.
Mak iha tinan 2026, Autoridade Munisípal Baucau, liuhusi Programa Dezenvolvimentu Integradu Munisípal (PDIM), kontrata kompaña Adedebideal Unip. Lda. atu hala’o reabilitasaun estrada husi área mota Daramata to’o Eskola Daramutu Atelari, ho naruk hamutuk 2.8 quilómetru.
“Servisu ne’e durante tinan ida mak Estadu fó fiar ba sira. Iha mota rua ne’e sira sei konstrui pasadeira. Estrada ne’e sei cór, ne’ebé ita haree hela kompaña nia servisu, tanba tempu mós atu udan ona,” hateten Paul ba jornalista sira iha Daramutu Atelari, Kinta (24/09/2026).
Paul apresia Governu nia desizaun aloka orsamentu liuhusi Autoridade Munisípal Baucau hodi dezenvolve infraestrutura bázika, liuliu iha Suku Atelari, atu responde ba problema estrada ne’ebé komunidade entrenta durante tinan barak.
Maibé, nia hateten katak progresu servisu iha terenu seidauk satisfatóriu, tanba kompaña hahú servisu iha fulan Abril 2026, maibé to’o agora servisu prinsipál sira seidauk avansa signifikativu.
Tuir nia, servisu ne’ebé kompaña kompleta to’o agora foin liu-liu alargamentu estrada no abertura dalan ba konstrusaun valeta, enkuantu konstrusaun pasadeira iha mota Daramata no Maurate seidauk hahú.
“Ami nu’udar Autoridade Suku nafatin husu kompaña atu hadau tempu, tanba udan besik ona. Maibé preokupasaun ida mak sira nia ekipamentu pezadu ne’ebé uza ba servisu avaria hela deit. Entaun progresu seidauk to’o 50%, tanba foin iha faze ateru deit,” Paul rekomenda
Nia hateten katak, maski progresu projetu seidauk efetivu, Autoridade Suku sei kontinua enkoraja no akompaña kompanhia atu servisu bele remata tuir prazu kontratu ne’ebé Governu no kompanhia konkorda ona.
Iha sorin seluk komunidade lokal, João Freitas Gama, mos kritika progresu projetu ne’e ne’ebé konsidera seidauk di’ak. Tanba hosi problema ne’ebé nia haree iha terenu mak falta ekipamentu ne’ebé presiza atu apoia servisu konstrusaun.
“Ami husu ba na’in projetu, hanesan Autoridade Munisípal Baucau, atu fó atensaun ba kompanhia ne’e no husu atu aselera servisu, tanba udan mai ona no sira nia servisu la’o la di’ak,” nia rekomenda
Liga ho asuntu ne’e, STL tenta konfirma informasaun ho Diretór Kompanhia Adedebideal Unip. Lda., maibé seidauk hetan komentáriu, tanba diretór refere sei hala’o hela atividade balu iha Dili.
Projetu reabilitasaun estrada ne’e, tuir informasaun Autoridade Suku, sei fó benefísiu ba komunidade ho estimasaun uma-kain 300 iha aldeia haat, hanesan Liarafa, Nelu’uai, Atelari no Sirimana.
(tom)
