DILI, STLTIMORLESTE.com – Iha loron 11 fulan Junhu tinan nee, Kopa Mundial 2026 hahu ofisialmente ona. Maski jogu sira halao dook iha Amerika Norte, ksolok husi eventu desportiva nee sente too kedas iha kapital Díli no Munisipiu sira seluk iha Timor Leste (TL). Tanba adeptu sira hahu hias (dekora) karet no motor ho atributu ekipa nasional Portugal nian ho kor mean no verde dominante, too hasae bandeira Portugal iha uma oin no sorin nuudar manifestasaun ksolok no apoiu total, ba ekipa neebe sira hadomi ka apresia ba inisiu kompetisaun mundial nee.
Bazeia ba rezultadu observasaun jornalista STL nian iha terrenu, adeptu futebol sira hatudu ona sira nia entuziasmu neebe aas tebes hodi akompanha loron 11 junhu 2026, nuudar loron neebe marka ona ba abertura husi kompetisaun futebol mundial nian.
Adeptu ekipa nasional Portugal nian mak nuudar grupu ida neebe hatudu dedikasaun makas liu iha Timor-Leste (TL). Hanesan tradisaun ba loron boot futebol nian, sira komesa ona muda sira nia kareta no motor ho atributu Portugal nian, inklui kesi bandeira ho kor mean no verde neebe sai nuudar sinal ba sira nia sentimentu apoiu ba ekipa nasional Portugal.
Iha dalan publiku sira, bele haree kareta ho motor barak mak hatudu bandeira Portugal nian neebe kesi metin iha oin, espelhu sorin sorin ka kareta nia odamatan sorin no kotuk. Adeptu sira la hanoin barak atu gasta tempu no osan atu sosa ekipamentu sira nee, maski sira hatene katak jogu sira sei halao iha fatin neebe dook tebes, maibe sira sente katak prezensa dedikadu husi dook bele fo motivasaun ba sira nia idolu sira iha kampu laran.
Laos deit iha veikulu, maibe iha fatin fatin hanesan rezidensia, loja too fatin publiku sira, adeptu sira komesa hasae ona bandeira Portugal nian. Ho ksolok neebe boot, sira komesa organiza mos planu atu halibur malu hodi haree jogu hamutuk iha ekran boot (nonton bareng), neebe sai ona kultura diak ida iha Timor-Leste durante tempu Kopa Mundial.
Ba povu Timor Leste neebe ho laran metin ba ekipa Portugal, futebol laos deit kompetisaun desportivu, maibe reprezenta ligasaun emosional no istoriku neebe klean tebes. Lealdade ba ekipa nasional Portugal nian nuudar espelhu sentimentu neebe labele haketak husi kbiit ekipa nian, tan nee sira hatudu suporta total husi inisiu, ho fiar boot katak sira nia idolu sira sei hatudu kualidade diak iha kampu laran.
Situasaun iha Díli hahu animadu liu tan ho barulhu husi motor, kareta no ksolok joven sira iha dalan ninin. Maski adeptu seluk husi pais seluk mos, maibe forsa husi adeptu Portugal nian mak domina liu panorama kapital iha laran, neebe hatudu katak futebol iha poder atu halibur ema hotu.
Laos deit iha mundu real, ksolok nee mos habelar too espasu dijital, liu liu iha Facebook no TikTok. Adeptu sira iha Díli no Munisipiu sira seluk komesa kria no fahe kontiudu kreativu, hanesan edisaun imajen no vidio neebe hatudu bandeira Portugal nian hasae iha fatin fatin. Ho aplikasaun editor, sira transforma fotu sira hodi hatudu sira nia dedikasaun, neebe sai nuudar dalan ida atu hametin apoiu husi distansia ba ekipa neebe sira gosta ka hadomi.
Maibe tenke respeitu ba orden publika no disiplina iha viajen nuudar buat neebe nesesariu tebes, atu tau matan ba bainhira ema hotu selebra festa boot nee iha dalan. Konsiensia fizika husi enaa hotu atu respeita regra Tranzitu nian sai save prinsipal, hodi asegura katak ksolok Kopa Mundial 2026 nian bele kontinua lao ho seguru, hakmatek no livre husi kualker insidente neebe la hakarak atu akontese.
Progresu husi kompetisaun nee fo motivasaun boot ba adeptu sira iha rai laran, tan nee sira hahu ona preparasaun atu akompanha ho laran metin jogu hotu hotu husi Portugal. Tuir adeptu Pedro da Conceicao Soares katak, sira kesi bandeira nuudar manifestasaun sentimentu neebe boot tebes ba ekipa nasional Portugal, ho fiar katak sira nia idolu sira sei lori vitoria ba sira nia rai neebe sira hadomi.
“Ami prontu lori barulhu no ksolok nee ba dalan dalan too final, tanba ho pasu ekipa nasional Portugal nian, ami sente katak ami mos parte husi ekipa neebe sei manan iha kompetisaun Kopa Mundial 2026 nee,” dehan Pedro ba STL, Segunda nee (08/06/2026).
Nia afirma, bandeira Portugal nian iha fatin fatin nuudar sasin ida ba ksolok komunidade Timor-Leste nian, iha Kopa Mundial 2026. “Bandeira sira nee laos deit simbolu, maibe nuudar laran metin neebe lori kbiit ba ekipa hodi manan,”hatete Pedro.
Entrntretantu iha Kopa Mundial 2026, nasaun 48 mak sei kompete hodi buka titlu mundial. Konaba ekipa nasional Portugal, sira sei halao sira nia jogu dahuluk, iha loron 17 Junhu hasoru Repescagem intercontinental 1, tuir mai, iha loron 23 junhu Portugal sei hasoru ekipa husi Uzbequistão, no iha loron 28 Junhu, Portugal sei enfrenta ekipa husi Colombia.
(car)
