DILI, STLTIMORLESTE.com – Adeptu futebol Selesaun Portugal nian iha Timor Leste hatoo sira nia sentimentu la “Sabar” hodi hein konfrontu primeiru entre Portugal hasoru Kongo DR iha kompetisaun Kopa Mundial 2026. Jogu faze grupu neebe tama ba grupu K nee sei halao iha Estadiu Houston, Texas, Estadus Unidus Amerika, iha loron Kinta, 18 Junhu nee, tuku 02:00 madrugada oras Timor Leste.
Partisipasaun iha edisaun 2026 nee nuudar susesu boot ida, tanba sai mos hanesan partisipasaun ba dala sia (9) ba selesaun Portugal nian iha istoria Kopa Mundial. Desde sira nia partisipasaun primeiru iha tinan 1966, nasaun neebe konhesidu ho naran “Selecao das Quinas” nee konsege mantein sira nia prezensa konsistenrte hodi labele falta iha edisaun futebol mundial nian sira ikus nee.
Iha turnamenu boot nee, Portugal kontinua konfia sira nia taktika no kapasidade jogu ba Cristiano Ronaldo neebe sei dirije ekipa nuudar kapitaun, hodi akompanha mos husi treinador Roberto Martinez neebe kaer kbit hodi lidera no gia sira nia trajetoria estratejika husi kadeira treinador nian. Kombinasaun entre lideransa fiziku Ronaldo nian iha kampu laran no tatika husi Martinez sai nuudar estratejia prinsipal neebe adeptu sira hotu hein hodi haree.
Atu nunee bele lori kbit neebe boot, Portugal mos lori kombinasaun ida neebe eklibradu hosi jogador senior sira neebe ho kbiit no konhesimentu luan ho jerasaun foun neebe talentozu. Uniaun matenek hosi veteranu sira neebe hatene ona lalaok kompetisaun nian ho enerjia foun husi foinsae sira nee. Sai nuudar arma prinsipal ba selesaun Portugal hodi buka vitoria iha fatin prestiju nee.
Bazeia ba kalendariu ofisial, konfrontu entre nasaun rua nee sei hahu halao iha tuku 02:00 madrugada oras Timor-Leste (TL). Jogu nee nuudar faze determinante ba selesaun Portugal atu labele lakon pontu hodi nunee bele garantia fatin iha faze tuirmai.
Aleinde hasoru Kongo DR, Portugal neebe mos iha pozisaun forte iha grupu K sei kontinua sira nia viajen iha faze grupu husi hasoru selesaun Uzbekistan iha Estadiu Houston mos, neebe sei joga iha koron Tersa 23 Junhu 2026.
Atu taka faze grupu nian, selesaun Portugal sei halao jogu ikus liu hasoru selesaun Kolombia, neebe prevee sei sai konfrontu neebe kbiit no badinas tebes iha grupu K laran. Jogu futebol nee bazeia ba planu sei halao iha loron Domingu, 28 Junhu 2026, hodi determina se fali mak sei sai kampionatu grupu nian hodi hakat ba faze eleminasaun.
Iha Kopa Mundial edisaun nee, fase grupu halao ho kompetisaun neebe kompostu hosi ekipa 48, neebe fahe ba grupu barak hodi buka titlu kampionatu mundial nian. Adeptu futebol iha Timor-Leste bele akompanha dezempenhu Cristiano Ronaldo ho nia maluk sira iha Kinta Madrugada nee.
Entretantu husi rai laran adeptu Portugal nian iha Timor-Leste espresa sira nia sentimentu haksolok no espetativa aas tebes ba jogu nee. Inklui mos Adeptu Francisco Alves Sarmento neebe haktuir katak, nia la sabar ona atu hein hodi haree dezempenhu hodi kapitaun Cristiano Ronaldo ho nia maluk sira.
Maski jogu nee halao iha madrugada laran, ida nee sei la hanetik nia entuziasmu hodi fo apoiu tomak, no nia mos dehan kedas.” Hau la hein ka sabar ona atu haree Cristiano ho ekipa joga. Tanba ho kombinasaun taktika foun hosi Martinez, hau fiar Portugal iha kbiit boot atu lori vitoria primeiru hodi loke dalan ba titlu kampionatu,”hatete Francisco ba STL, Tersa nee (16/06/2026).
Adeptu Portugal iha Timor-Leste nee hatutan, vitoria iha jogu dahuluk nee sei laos deit fo pontu tolu neebe esensial, maibe sei sai mos hanesan kbiit laran manas boot ida ba ekipa tomak hodi hatudu ba mundu katak Portugal prontu ona hodi hakat ho ain neebe loos iha Kopa Mundial nee. Ho apoiu neebe boot tebes husi adeptu sira iha Timor-Leste no mos iha fatin hotu hotu, Kinta Madrugada nee situasaun iha Estadiu Houston sei sai fatin ba jogu neebe nakonu ho emosaun no kompetisaun neebe hein naruk ona.
(car)
