DILI, STLTIMORLESTE.com – Falta loron hira tan atu Kopa Mundial hahu, ambiente ka situasaun iha kapital Díli no munisipiu sira hahu nakonu ho kor mean no verde. Adeptu sira iha Timor Leste (TL) hatudu interese boot atu sosa bandeira Portugal kompara ho bandeira husi ekipa sira seluk, neebe hatudu lealdade boot ba ekipa “Seleção das Quinas.”
Tuir observasaun jornalista STL iha terrenu haree katak, iha dalan publiku sira situasaun Kopa Mundial hahu nakonu ho kor mean no verde neebe dominante. Motor no kareta barak neebe movimentu iha estrada kesi metin bandeira Portugal iha parte oin no kotuk kareta nian, espelhu, too parte seluk motor nian. Laos deit bandeira, adeptu sira mos komesa uza atributu seluk hanesan xapeu, kamizola ho kor ekipa Portugal nian nuudar forma atu hatudu identidade ka lealdade.
Iha parte komersiu (merkadu) nian, interese ba bandeira Portugal sae makaas tebes kompara ho ekipa sira seluk. Stok bandeira Portugal hotu deit tanba ema sosa ho entuziasmu. Ema neebe mai sosa laos deit iha Díli laran, maibe balu mai husi munisipiu sira ho objetivu atu kesi bandeira refere iha sira nia veikulu ka kareta nuudar prova lealdade ba “Seleção das Quinas.”
Nunee mos liu husi mundu dijital, adeptu sira iha rai laran mos hatudu kreatividade boot. Sira uza aplikasaun edisaun imajen hodi hasae bandeira Portugal iha fatin estratejiku sira. Imajen sira nee kria ho kualidade aas hodi halo viral iha Facebook no TikTok, hodi dada atensaun husi utilizador sira neebe fo entuziasmu ba movimentu ksolok nee.
Movimentu ida nee hatudu katak ba adeptu sira iha Timor Leste, Portugal mak nasaun ida neebe nuudar sira nia favoretu boot liu ba Kopa Mundial 2026. Atividade nee la rezulta konflitu, maibe transforma dalan publiku no espasu dijital sai fatin ksolok neebe nakonu ho kor ekipa favoretu, hatudu katak adeptu sira preoarat aan ho entuziasmu boot atu simu eventu mundial nee.
Entuziasmu nee hetan konfirmasaun husi komunidade sira, neebe involve diretu iha ksolok Kopa Mundial nian. Hanesan Mario da Costa, adeptu ida iha Díli hatete katak, sira nia asaun nee hanesan forma ksolok ba eventu Kopa Mundial nee.” Hau sosa bandeira Portugal, tanba hau gosta tebes ekipa ida nee. Ita haree iha dalan kareta ho motor kesi bandeira. Ida nee festa futebol neebe loos,” dehan Mario ba STL, Sabadu nee (06/06/2026).
Nia hatutan, bandeira neebe ho kor mean no verde neebe nakonu iha dalan bele halo ekipa Portugal sente katak sira iha apoiu neebe boot husi Timor Leste, maske distansia dok maibe adeptu sira nia laran iha sira nia sorin.
Iha parte seluk, Vendador José Vieira neebe faan ekipamentu futebol haree katak stok bandeira Portugal hotu lalais. ”Stok bandeira Portugal hotu lalais, loron loron ema mai sosa laos deit bandeira kiik maibe bandeira boot mos. Hotu loron rua ka tolu deit, stok neebe ami foin sosa hotu ona,” dehan nia.
Entretantu Kopa Mundial 2026 sei hahu iha loron 11 fulan Junhu 2026, no sei sai eventu istoriku tanba sei involve nasaun hamutuk 48 husi kontinente hotu. Kopa Mundial tinan nee sei halao iha nasaun tolu hanesan Estadu Unidus Amerika (EUA), Mexico no Kanada.
Ekipa Portugal hetan sorte tama iha Grupu K, hamutuk ho nasaun sira hanesan Portugal, Repescagem Intercontinental 1, Uzbequistao no Colombia. Portugal sei realiza sira nia jogu dahuluk iha loron 17 Junhu 2026, hodi kontra ekipa Repescagem Intercontinental 1.
(car)
