DILI, STLTIMORLESTE.com – Timor-Leste hahú nia kampaña iha ASEAN Football Federation (AFF) Hyundai Cup 2026 ho rezultadu ne’ebé la satisfas, derota hasoru ekipa jigante Ázia Sudeste no kampeaun defensór Vietnám ho skor boot 0-7.
Jogu Grupu A, Timor-Leste kontra Vietnám ne’e realiza iha Estádiun Chonburi, Tailándia, iha Sesta-feira (24/07/2026). Timor-Leste partisipa iha torneiu ne’e uza Estádiun Chonburi sai hanesan sira-nia home base tanba seidauk iha estádiun apropriadu iha Timor-Leste ne’ebé tuir padraun ka estandar husi AFF no FIFA nian.
Iha jogu refere, Timor-Leste ladun fó presaun maka’as ba ekipa Vietnám. Ekipa jigante Ázia Sudeste ne’e kontrola hotu ritmu jogu nian no la haree ameasa boot ida husi selesaun Timor-Leste.
Golu sira iha jogu ne’e mai husi jogadór Vietnám, Hendrio, iha minutu 7 no 41. Jogadór Đ. Nguyễn hatama hat-trick iha minutu 31, 42, no 65. Rafaelson mós hatama golu iha minutu 45+1, no ikus liu Q. Nguyễn hatama golu iha minutu 79 hodi taka jogu ne’e ho skor 0-7.
Ho rezultadu ne’e, Timor-Leste provizoriamente iha pozisaun ikus liu iha tabela klasifikasaun Grupu A, iha Kambója nia okos. Kambója mós hala’o ona nia jogu dahuluk iha AFF Hyundai Cup 2026 ne’e hasoru Singapura no lakon ho skor 1-2 iha minutu ikus.
Aleinde ne’e, Timor-Leste tama iha Grupu A hamutuk ho Vietnám, Singapura, Indonézia, no Kambója. Depoiz hasoru Vietnám, ekipa selesaun Timor-Leste sei hasoru Singapura iha Segunda-feira (27/07/2026).
AFF Hyundai Cup 2026 tinan ne’e realiza husi loron 24 Jullu to’o 26 Agostu, iha sidade 10 ne’ebé namkari iha nasaun 9 hanesan Indonézia, Vietnám, Tailándia, Malázia, Singapura, Kambója, Laos, Mianmár, no Filipina. Timor-Leste hili Estádiun Chonburi iha Tailándia tanba konsidera seidauk iha estádiun ne’ebé apropriadu hodi realiza jogu, tanba seidauk tuir padraun AFF no FIFA nian. Faze knock-out sei hahú iha loron 15 Agostu to’o 26 Agostu.
(Ekipa STL)
