DILI, STLTIMORLESTE.com – Limitasaun orsamentu halo Ministeriu Agrikultura la konsege atende área kultivu hotu ho input no ekipamentu agríkola.
Diretor Nasional Agrikultura, Hortikultura no Protesaun Plantas, Lusio Nuno hatete, ministeriu foka ba hasa’e produsaun liu husi distribuisaun input no makina agríkola.
Input sira inklui fini, mina gratuitu, adubu no pestisida, ne’ebé distribui ba agrikultór sira atu apoia produsaun, liuliu iha natar rai maran.
Maibé, nia hatete alokasaun orsamentu kada tinan limitadu, nune’e apoiu ministeriu nian seidauk bele kobre área kultivu hotu iha territóriu nasionál.
“Ami halo bazeia ba alokasaun orsamentu ne’ebé iha, tanba ne’e labele kobre área kultivu hotu.”
Nuno ko’alia ba STL iha Edifísiu MAPPF Komoro, Segunda-feira (05/10/2026), no hatete prioridade produsaun mak hare, batar, sereais, fore no hortikultura.
Nia hatete, volume input ne’ebé akizisaun no distribui kada tinan depende ba orsamentu disponivel, nune’e la bele atende nesesidade agrikultór hotu.
Nuno hatete, munisípiu ho poténsia boot ba produsaun hare inklui Bobonaro, Covalima, Manufahi, Ainaro, Baucau, Viqueque no Oecusse.
Tuir nia, dadus iha 2025 área kultivu hare atinji aproximadamente 37.691 hektare, ho produsaun hare kulit hamutuk 158.303 tonelada.
Nia hatete, produsaun hare kulit ne’e bainhira konverte ba foos, estimasaun bele atinji 94.982 tonelada iha tinan refere.
“Ami nia input sira distribui ba fatin hotu, maibé atendimentu no jestaun iha nivel munisípiu,” dehan Nuno.
Nia esplika katak, direksaun agrikultura munisípiu mak jere distribuisaun apoiu ba agrikultór, liuliu sira ne’ebé presiza asisténsia.
Nuno hatete, trator no makina agríkola boot sira jere husi direksaun agrikultura munisípiu, inklui fornese mina ba operasaun ekipamentu.
Enkuantu trator ki’ik sira destina ba grupu agrikultór, hodi fasilita preparasaun rai no aumenta efisiénsia atividade agríkola.
Makina kuda no dulas hare distribui ba PAM, ne’ebé orienta utilizasaun ekipamentu liu husi direksaun agrikultura munisípiu.
(dom)
