BAUCAU, STLTIMORLESTE.com – Autoridade Inspesaun no Fiskalizasaun Atividade Ekonómika, Sanitária no Alimentár, Instituto Públiku (AIFAESA, I.P.) liuhusi enkontru koordenasaun ho Autoridade Lokal no entidades seguransa atu fortifika kontrolu atividade ekonómika iha Munisípiu Baucau.
Koordenadór AIFAESA I.P. Rejiaun Leste, David Belarmino Soares, hateten enkontru koordenasaun ne’e nu’udar parte husi programa kontinua AIFAESA nian, liuliu hafoin destakamentu ekipa iha Rejiaun Leste atu monitoriza no kontrola atividade ekonómika iha Munisípiu Lautém, Viqueque no Baucau.
Nia hateten, koordenasaun ho Autoridade Suku, Postu Administrativu, Autoridade Munisípal no instituisaun seguransa importante tebes atu hamutuk tau matan ba atividade komersiál, liuliu iha Merkadu Munisípal Baucau.
“Husi entidades sira ne’e, ita bele hetan ideia ida ne’ebé di’ak kona-ba oinsá ita fó asisténsia ba negósiu sira no komunidade, atu bele garante nafatin saúde públiku,” David Belarmino Soares hateten hafoin sesaun abertura enkontru koordenasaun iha Salaun Soimali, Vila Nova, Baucau, Tersa (29/09/2026).
Nia esplika katak, destakamentu AIFAESA iha Munisípiu Baucau ne’e responsavel ba parte Rejiaun Leste no sei kontinua koordena ho Autoridade Munisípal, Autoridade Suku, Postu Administrativu no entidade seguransa atu fortifika fiskalizasaun ba atividade ekonómika tuir regulamentu ne’ebé fó kompeténsia ba AIFAESA.
Tuir David, AIFAESA rejista ona atividade ekonómika hamutuk 371 iha Munisípiu Baucau. Númeru ne’e seidauk inklui atividade negósiu sira iha nivel Suku no Aldeia, tanba dadus ne’e kobre atividade sira ne’ebé rejistadu husi nivel Postu Administrativu to’o Munisípiu.
Maski destakamentu AIFAESA iha Baucau seidauk to’o fulan ida, maibé ekipa ne’e simu ona keixa rua ne’ebé liga ho atividade negósiu iha Munisípiu Viqueque no Baucau.
Maibé, husi keixa rua ne’e, AIFAESA seidauk aplika sansaun ba parte sira ne’ebé hetan keixa, tanba kazu sira refere seidauk priense kritériu atu aplika sansaun.
David hateten, liuhusi koordenasaun ho entidades lokal, AIFAESA hakarak aumenta kontrolu sosial no asegura informasaun kona-ba regra atividade ekonómika bele to’o ba komunidade no operador ekonómiku sira.
“Loos, tanba enkontru koordenasaun ne’e ho entidades sira ba kontrolu sosial. Informasaun sira ne’ebé AIFAESA tranmite bele transmite tutan ba komunidade sira. Ba oin, ami mós sei enkontru ho operador ekonómiku sira atu ita bele prevene sala,” nia afirma.
Iha parte seluk, Sekretáriu Munisipál Planeamentu, Investimentu no Dezenvolvimentu Integradu Baucau, Eduardo Filipe Ximenes, apresia presensa AIFAESA iha Munisípiu Baucau.
Maibé, nia husu AIFAESA atu molok hala’o atividade monitorizasaun no fiskalizasaun, tenke aprezenta oráriu ba Autoridade Munisípal, nune’e entidade lokal sira bele prepara no fó apoiu nesesáriu durante atividade.
Eduardo mós husu atu kontrolu la limita de’it iha área Vila Baucau, maibé tenke estende to’o Postu Administrativu sira.
“Kontrolu atividade ekonómiku ne’e labele iha de’it área sirkunstánsia Baucau Vila, maibé bele mós ba Postu sira. Tanba dala ruma kios sira iha ne’ebá fa’an Pop Mie ne’ebé expire tiha ona, maibé kontinua fa’an. Manu-tolun mós dala ruma hotu, ita daan han laiha sabor,” Eduardo hateten.
Nia mós husu AIFAESA atu fó atensaun ba atividade produsaun tahu no tempe iha área Baucau Vila, inklui restaurante sira, tanba konsidera presiza kontrolu liután kona-ba kondisaun ijiene no seguransa ai-han.
Enkuantu ne’e, Segundu Komandante Komando Polísia Munisípiu Baucau, Superintendente Fasio de Jesus Lima, asegura katak PNTL prontu fó apoiu ba AIFAESA iha prosesu inspesaun no fiskalizasaun, liuliu atu asegura ai-han ne’ebé seguru ba komunidade.
“Dala barak inspesaun ne’ebé la’o iha ita nia Munisípiu deteta sasan sira ne’ebé fa’an iha kios no loja liu prazu, maibé kontinua fa’an. Ne’e obrigatóriu ba ita hotu atu fó atensaun ba situasaun ida ne’e hodi prevene problema sosial,” Fasio de Jesus Lima hateten.
Enkontru koordenasaun ne’e hetan partisipasaun husi reprezentante diresaun no servisu munisipál, Autoridade Suku Triloca no Tirilolo, no entidades relevante sira seluk.
(tom)
