DÍLI, STLTIMORLESTE.com – Akademiku UNTL, Sebastião dos Santos, defende kriasaun sentru juvenil atu asegura no reabilita minoridade sira ne’ebé komete krime.
Akademiku Universidade Nasionál Timor Lorosa’e (UNTL), Sebastião dos Santos, defende katak Governu presiza harii sentru juvenil atu asegura minoridade sira ne’ebé komete krime no prevene sira husi repete hahalok ne’ebé viola lei.
“Hau hanoin presiza instala sentru juvenil atu akumula minoridade sira ne’ebé livre komete krime. Se la iha sentru juvenil, sei la halo buat ida,” Sebastião dos Santos dehan ba STL iha Kaikoli, Kinta-feira (22/10/2026).
Nia esplika katak, komunidade barak preocupa ho minoridade sira ne’ebé komete krime, tanba ne’e konsidera katak tempu ona atu estabelese sentru juvenil.
Tuir nia, sentru juvenil bele sai fatin apropriadu atu fó edukasaun no orientasaun ba joven sira, hodi hadi’a sira-nia hahalok no prevene krime.
Iha sorin seluk, Ministru Justisa, Sérgio Hornai, informa katak Governu sei hari sentru juvenil iha Tibar atu asegura no reabilita minoridade sira.
“Sei harii iha Tibar atu asegura minoridade sira. Ida-ne’e mos sai hanesan sentru reabilitasaun atu forma minoridade sira,” Sérgio Hornai dehan.
Nia hatutan katak, sentru ne’e sei separa minoridade sira husi ambiente ne’ebé la apropriadu no fó formasaun espesífika atu ajuda sira muda hahalok no prepara sira atu fila fali ba komunidade.
Iha parte seluk, jurista Sérgio Dias Quintas mós defende kriasaun sentru juvenil, tanba nia konsidera katak falta fatin apropriadu bele sai obstákulu ba prosesu asegura no reabilita minoridade sira ne’ebé komete krime.
Quintas sujere atu hari sentru ne’e lalais, hodi fó oportunidade ba minoridade sira atu simu orientasaun no reabilitasaun.
Estabelesimentu sentru juvenil presiza tuir lei ne’ebé vigora no garante direitu labarik sira, inklui asesu ba edukasaun, reabilitasaun no reintegrasaun ba família no komunidade.
(ter)
