DILI, STLTIMORLESTE.com – Akademista sira fo apresiasaun boot ba asaun Polisia Nasional Timor Leste (PNTL) liu husi Diresaun Servisu Investigasaun Kriminal (DSIK) hamutuk ho Servisu Migrasaun, neebe susesu sobu rede kriminal scam call center ho envolve sidadaun estranjeiru nain 30 iha otel boot ida iha area Cristo Rei, Aldeia Fatukama, Suku Meti-Aut, Munisipiu Dili.
Apresiasaun nee hatoo husi Akademista UNPAZ, Manuel Soares neebe hateten katak, aksaun konjunta no lalais husi DSIK no Servisu Migrasaun hatudu profisionalizmu no vijilansia aas, husi autoridade seguransa sira hodi proteje seguransa nasional no imajen ka reputasaun rai-laran husi ameasa krime transnasional.
“Aksaun nee hatudu katak autoridade seguransa sira prontu no iha kapasidade hodi deteta, no foti asaun firmi ba krime organizadu transnasional neebe buka, atu halo Timor Leste sai sira nia subar fatin,” dehan Manuel ba STL, Segunda nee (27/07/2026).
Nia mos akresenta katak, rede scam call center internasional sira baibain aproveita frakeza iha kontrolu imigrasaun no teknolojia. Tan nee, susesu sobu ka desmantela grupu estranjeiru nain 30 nee sai nuudar sinal forte katak, Timor Leste la tolera atividade kriminal hanesan nee.
Iha biban nee, akademista nee husu ba Governu no autoridade sira atu reforsa liu tán kontrolu iha liña fronteira no viza entrada, hamutuk ho sektor privadu sira hanesan otel no guesthouse hodi fo relatoriu sedu se hetan movimentu neebe suspeitu.
Iha parte ketak, Observador Polítika, Samuel da Silva mos dehan katak, reaksaun lais husi PNTL no Servisu Migrasaun, hatudu avansu boot iha intelijensia seguransa nasional nian. Nia enkoraja atu kontinua hametin kooperasaun internasional, hodi troka informasaun intelijensia nian, atu nunee Timor Leste labele sai alvu fasil ba rede kriminal transnasional sira iha futuru.
Entretantu, iha sabadu (26/07/2026), antes foti operasaun ho eskala boot nee, ekipa servisu serku uluk tiha arredores otel nian. Nunee, wainhira membru sira tama ba laran, sidadaun estranjeiru nain rua tenta halai subar, maibe ekipa servisu konsege duni tuir no ikus mai kaptura iha estrada publika Cristo-Rei nian.
Iha operasaun nee, ekipa servisu mos prende objetu krime iha otel laran neebe konsidera hanesan evidensia teknolojia dijital no asegura sidadaun Xinez nain 30 neebe kompostu husi feto nain 4 no mane nain 26, neebe daudaun nee detidu hela iha autoridade sira nia liman, hodi hakat ba prosesu investigasaun klean no prosesu legal tuir lei neebe vigora iha Timor Leste.
(car)
