DILI, STLTIMORLESTE.com – Governu liu husi Ministeriu Obras Publiku (MOP) no Terras Propriedade tau ona marka katak, komunidade nia uma tenke dook husi estrada 19,50 metru, maibe MOP aumenta tan marka 23,60 metru, tanba nee halo komunidade sira preokupa ho desizaun neebe la klaru.
Xefe Suku Bekora Interinu, Luis do Carmo da Soares dehan, iha loron 11 fulan Fevereiru Ministeriu Obras Publiku (MOP) mai hodi tau marka nee 19,50 metru, maibe horiseik mai fali dehan sukat 23,60 metru, desizaun ida nee halo komunidade sira konfuzaun.
“Sira mai dehan dook husi estrada nee 19,50 metru, agora horiseik mai sukat fali tenke 23,60 metru, ida nee halo ami konfuzaun loos, tanba komunidade balu baku ona husi sira sukat nee, depois hada tiha fali bloku ba iha tanda neebe sira tau,” hatete Luis ba jornalista sira iha Sede Suku Bekora, Kinta (20/02/2025).
Nia esplika, MOP no Terras Propriedade tau ona marka ba uma komunidade sira neebe afeitadu ba alargamentu estrada, katak tenke dook husi estraga 19,50 metru, tanba nee sira sobu ona no hadia fila-fali, maibe MOP mai tan laos 19,50 metru, maibe 23,60 metru.
Iha fatin hanesan, Komunidade Suku Bekora, Florencio da Costa esplika, nuudar komunidade neebe afeitadu ba alargamentu estrada iha Suku Bekora, Postu Administrativu Cristo Rei, Munisipíu Dili, senti triste, tanba lakon hela fatin, maibe tenke kontribui mos ba dezenvolvimentu, maibe Ministeriu Obras Publiku nia desizaun nee la klaru mai ninia sidadaun sira.
(jen)
