BAUKAU, STLTIMORLESTE.com – Projetu reabilitasaun estrada urbana Baukau Vila neebe ekipa tekniku husi Ministeriu Obras Publikas (MOP) halao identifikasaun iha afetadu hamutuk 55.
Koordenador Tekniku Obras Publikas Destakadu Munisipiu Baukau, Diego Cipriano Caleza esplika, hafoin lansamentu fatuk dahuluk ba projetu reabilitasaun estrada urbana Baukau Vila parte kompanhia sira halao servisu alargamentu ba estrada no hamutuk ho tekniku husi Ministeriu Obras Publikas halao identifikasaun ba uma komunidade sira iha balu neebe afetadu ba projetu refere, tanba besik liu estrada ninin.
“Afetadu husi pakote primeiru nee iha 24 pakote seluk neebe vegel halo nee 31 neebe hamutuk 55,” hateten Koordenador Tekniku Obras Publikas Destakadu Munisipiu Baukau, Diego Cipriano Caleza ba jornalista sira knaar fatin Vila Nova Baukau, Segunda (30/03/2026).
Nia sublina, husi afetadu 55 kompostu husi uma komunidade, loja, moru protesaun no seluk tan neebe nia indemnizasaun sei depende ba levantamentu iha terrenu.
Nia fundamenta, dadus afetadu hirak nee dadaun iha ona Diresaun Nasional Verifikasaun ba prosesu idemnizasaun, tanba nee husu afetadu sira kopera nafatin prosesu reabilitasaun estrada refere.
“Hau hanoin ita seidauk bele koalia too iha neeba tanba buat ida prosesu nee ita hein nia atualizasaun relatoriu final mak ita bele koalia,” Diego akresenta.
Koordenador nee deklara, kona-ba data atribui indemnizasaun ba afetadu sira sei iha prosesu nia laran, tanba nee nafatin hein atualizasaun husi Nasional.
Entretantu tuir dadus neebe STL iha, projetu reabilitasaun estrada urbana Baukau Vila diresaun husi area rotunda Wainiki Suku Bahu too area Suku Tirilolo responsabiliza husi kompanhia rua mak hanesan kompanhia JOVA Construction Unipessoal lda responsabiliza diresaun husi area rotunda Wainiki too rotunda Vila Nova Baukau Seksaun 00+000-02+880.0 ho valor orsamentu US$ 4,735,021.55 no Seksaun 1 – 5 diresaun husi rotunda Vila Nova too area Igreja Vizaun Kristaun Tirilolo responsabiliza husi kompanhia Vage’el Unipessoal Lda ho valor orsamentu US$ 3,764,933.21.
Husi projetu refere fiskaliza husi Ministeriu Obras Publikas ba durasaun servisu tinan 2 tuir planu finaliza iha 2027.
(tom)
