DILI, STLTIMORLESTE.com – Xefe Suku Kuluhun, Deus Dado Martins hatete, iha Suku Kuluhun iha aldeia tolu (3) mak afetadu ba alargamentu estrada.
“Ba komunidade kuluhun neebe mak afetadu ba alargamentu estrada mak iha aldeia tolu hanesan Aldeia Toko-Baru, Funu-Hotu no ida seluk aldeia Loe-Laco,” hatete Xefe Suku Kuluhun, Deus Dado Martins ba jornalista sira iha Sede Suku Kuluhun, Kinta (20/02/2025).
Nia dehan, husi aldeia tolu nee, fulan kotuk ekipa konjunta husi Terras Proriedade, Ministériu Obras Publika (MOP) no SEATOU mai enkontru ona ho komunidade Kuluhun iha loron 9 fulan Janeiru atu hamamuk fatin too iha loron 9 Fevereiru atu mai sobu, maibe SEATOU fo fali tempu no aumenta tan loron 11, entaun iha loron 17 Fevereiru mak foin mai sobu. Daudaun Governu sobu ona, maibe too agora populasaun sira seidauk hetan buat ruma husi Governu.
Nia rekonhese too agora sira seidauk hetan, maibe husu ba populasaun sira tenke mantein hein, tanba buat neebe koalia nee lalais, maibe prosesu administrativu nee kleur, nunee Governu sei la haluha, tanba nee hein deit buat hotu Governu sei fo.
Entretantu aldeia tolu nee total ba uma neebe hetan alargamentu estrada nee hamutuk 36 husi nee iha 33 uma ka baraka oan no uma tolu nee husi rai privadu.
No Suku Kuluhun iha aldeia hitu hanesan Funu-Hotu, Lao-Rai, Loe-Laco,Nato, Sorumutu ba Dame,Tane-Mutu no Toko-Baru II, no total populasaun hamutuk 10.311.
(jen)
