DILI, STLTIMORLESTE.com – Tribunal Judisial Primeira Instansia Dili (TJPID) iha loron Kinta (23/07/2026) halao julgamentu ba kazu pekulatu neebe envolve husi arguidu ho inisial M. Arguidu lori ba iha Tribunal tanba deskonfia foti osan estasionamentu US$ 8600.
Iha indisus katak, arguidu M nuudar funsionariu iha Administrasaun Munispiu Dili.
Arguidu koloka hodi halo kontrolu iha estasionamentu Merkadu Taibesi, nunee kontrolu kareta no motor tenke estasiona ho diak tuir regra no labele halo engarrafamentu iha Merkadu Taibesi.
Maibe, bainhira Autoridade Munisipiu Dili estabelese tiha sistema Pesoal Servisu Estasionamentu (PSE) hodi kobre reseita estasionamentu nian husi neeba, maibe osan neebe tama ba sistema referida menus. Nunee husi Diresaun Servisu Finansa Autoridade Munisípiu Dili suspeitadu katak, arguidu M mak foti osan sira.
Konsekuensia husi arguidu nia aktu nee, Ministeriu Publiku konstitui arguidu nuudar autor ba krime Pekulatu.
Antes nee Tribunal rona ona deklarasaun husi arguidu, tanba nee iha julgamentu kontinuasaun nee, Tribunal kontinua rona deklarasaun husi sasin sira.
Iha sala julgamentu laran, sasin MS deklara katak, momentu neeba sasin hanesan responsavel ba iha sistema PSE. No sasin asume kargu hodi jere sistema nee, maibe problema mosu ona. Tanba sasin rona informasaun husi parte Finansa Administrasaun Munisípiu Dili katak, reseita husi estasionamentu nee menus.
Sasin esplika, ho nunee mak finansas bolu sasin ba husu tuir situasaun nee, no loke prosesu ba funsionariu estasionamentu sira.
Sasin AM deklara, bainhira Administrasaun Munisípiu Dili implementa tiha sistema Pesoa Servisu Estasionamentu sira servisu loron tomak, osan sira neebe sira rekolha husi estasionamentu nee minimu US$ 80 too US$ 100.
Nia dehan, husi osan sira nee kompleta ho nia nota pagamentu kedan oras parajen loron no presu parajen nian.
Sasin esplika, sira atu foti nota ida nee sistema akapta hela no bainhira sira atu hatama fali osan sira neebe husi estasionamentu nee sistema akapta hotu.
Sasin deklara, momentu ida sira rekolha hotu osan parajen hodi entrega ba arguidu M, no arguidu mak lori ba iha Finansas hodi hatama ba sistema.
Sasin deklara, razaun entrega osan ba iha arguidu, tanba deit arguidu hela besik iha fatin neeba, maibe osan neebe entrega ba arguidu liu husi termu entrega asina kedan total osan neebe akomula husi estasionamentu nee.
Sasin J mos hateten, osan sira neebe rekolha husi estasionamentu nee entrega ba iha arguidu M. Sasin entrega osan nee hakerek montante osan tama nian no hasai foto kedan no halo termu entrega.
Hatan kona-ba tuir prosedimentu servisu nee osan tenke hatama ba arguidu M mak fo ba Finansas nee sasin laiha konesimentu.
Sasin hateten, sistema PSE nee mos sempre avaria, tanba buat foin hahu entaun sistema avaria duni no kauza husi ahi mate, maibe kuandu sistema moris fali sistema justifika katak osan tama hira nee justifika.
Sasin NS hateten, osan neebe hetan husi estasionamentu nee nia entrega ba arguidu M. Tuir sasin momentu nia entrega osan nee nia halo termu entrega liu husi formulariu.
Sasin esplika, momentu nee sasin entrega osan kompletu. No momentu neeba osan arguidu mak ba entrega iha Finansas, entrega ka la entrega nee sasin laiha konesimentu.
Sasin mos ladun hatene sistema apuramentu reseita estasionamentu nian, tanba bainhira lansa tiha sira laiha formasaun ba ida nee.
Sasin hatene katak sistema nee dala ruma avaria. Sistema nee kolekta loron ida US$ 5 too US$ 10, no kuandu osan falta sistema deteta kedan tanba bazeia ba resivu.
Sasin hateten la iha regra ida dehan osan tenke hatama ba iha arguidu M.
Rona tiha parte hotu, Tribunal marka fali kazu nee ba loron 17 Setembru 2026 tuku 09:00 hodi halo alegasaun.
Kazu nee prezide husi Juiz koletivu Zulmira Auxiliadora, Ivan Suritai no Arjentino Nunes, MP reprezenta husi Prokuradór Domingos Goveia, no arguidu hetan asistensia husi Advogadu Privadu.
(ter)
