DILI, STLTIMORLESTE.com – Tribunal Judisial Primeira Instansia Dili (TJPID) liu husi despaisu ba iha prosesu primeiru interogatoriu, deside aplika medida Prizaun Preventiva (PP) ba arguidu nain rua (2) ho inisial JACR no MZX.
Arguidu nain rua submete mai iha Tribunal, tanba alega naok karteira iha Praia Dos Coquiros hodi ikus mai rezulta Nadine Ribeiro do Carmo lakon vida no Euodia Agile do Carmo hetan kanek.
Arguidu nain rua lori mai iha Tribunal ho prosesu numeru Nuc, 0602/26.PNSIK, no Ministeriu Publiku (MP) promove arguidu nain rua ho krime roubu neebe previstu iha artigu 253, no krime Ofensa Neglijente neebe previstu iha artigu 148, no krime omisidiu neglijente neebe previstu iha artigu 140 husi Kodigu Penal Timor Leste nian.
Iha despaisu Tribunal nian liu husi Juiz Turnu Ivan Patrocenio deside aplika medida Prizaun Preventiva (PP) ba arguidu nain rua, tanba konsidera iha indisus forte ba krime neebe Ministeriu Publiku (MP) promove mai iha Tribunal.
Antes nee iha alegasaun Ministeriu Publiku (MP) neebe reprezenta husi Prokurador Turnu Aderito Tilman husu Tribunal atu aplika medida Prizaun Preventiva ba arguidu nain rua.
Enkuantu husi parte defeza nian, Defensor Publiku Fernando de Carvalho husu Tribunal tetu atu aplika medida ba arguidu nain rua.
Prosesu primeiru interogatoriu nee prezide husi Juiz Turnu Ivan Patrocenio, Ministeriu Publiku reprezenta husi Prokurador Aderito Tilman, arguidu nain rua hetan asistensia legal husi Defensor Publiku, Fernando de Carvalho.
Tuir observasaun STL nian iha Tribunal, depois despaisu Tribunal nian hatun, arguidu nain rua akompanha husi autoridade Seguransa, lori kedan ba iha Prizaun Bekora.
Rekorda katak, suspeitu nain rua polisia detein tanba alega naok karteira iha Praia Dos Coquiros iha loron 07 fulan Junhu, hodi rezulta Nandine lakon vida.
Husi akontesimentu nee, ikus mai autoridade seguransa detein suspeitu nain rua iha BTN Tasi-Tolu.
(ter)
