BAUKAU, STLTIMORLESTE.com – Osan tahan montante US$ 100 falsu, hahu sirkula ona iha Merkadu Munisipiu Baukau.
Nain ba kios Monster neebe lokaliza iha Aldeia Betulale, Suku Tirilolo, Postu Administrativu Baukau Vila, Jaime Freitas Carvalho aprezenta, iha loron 30 Abril tuku 23:58 OTL prezensa sidadaun mane joven ida, mesak ho motor Honda Beat Street kor metan uza kanu resin diresaun husi Vila Antiga ba kios refere, iha neebe kios nain la detekta numeru xapa matrikula, tanba too iha area kios refere, sidadaun nee para motor dook husi kios no lao ain tama ba kios laran.
Hafoin sidadaun ho osan falsu too iha kios nee hase kios nain atu sosa tua ABC kaixa ida ho folin US$ 36, maibe kios nain falha, tanba la simu uluk osan tahan husi sidadaun refere, maibe sura uluk osan volta fo ba sidadaun refere, iha neebe sidadaun refere mos uza tatika antes fo osan tahan falsu nee ba kios nain halo finze hamonu osan rahun balu husi osan volta, nunee kios nain preokupa osan rahun neebe monu sidadaun refere husik hela osan tahan falsu iha meza leten no foti snack Biskuat falun ida troka ho osan monu sai husi kios ho tua ABC kaixa ida folin US$ 36 inklui osan maizumens US$ 60 resin ho motor hases aan kedas husi kios refere.
“Nia halai tun tiha hau mos la sempat loke osan nee haree tau iha gaveta laran, liu 30 menit hanesan nee mak hau loke haree sente osan nee mahar fali mak hau fanu ferik oan haree osan falsu,” Nain ba kios Monster Jaime Freitas Carvalho hateten ba jornalista sira iha Betulale, Sabado (02/05/2026)
Nia sublinha, hafoin ho ferik oan haree osan tahan ida montante US$ 100 neebe simu husi sidadaun mane joven refere nota katak falsu, nia parte ho motor buka tuir kedas sidadaun joven mane refere too iha area Suku Seiçal, Buruma, Tasi, Teulale, Vila Antiga no Lamegua, tanba mezmu sidadaun refere nia la hatene nia hela fatin, maibe konhese tanba baibain sosa tua iha kios refere.
Nunee durante kalan tomak nia buka tuir, maibe la hetan sidadaun refere nia paradeiru, tanba nee iha loron 01 Maiu, nia parte aprezenta keixa no entrega ona evidensia osan tahan ida montante US$ 100 ba Komando Polisia Munisipiu Baukau atu asegura.
“Hau keixa tiha ona ba Polisia, osan nee mos entrega ona ba Polisia para labele akontese tan ba hau nia kolega sira seluk,” Jaime Freitas Carvalho akresenta.
Liga ba asuntu nee, STL tenta prezensa iha edifisiu Komando Polisia Munisipiu Baukau, maibe Komandante Komando Polisia Munisipiu Baukau laiha fatin atu fo komentariu.
(tom)
